Alleqri dünya çempionatına qədər qovulmayacaq

“Yuventus” rəhbərliyi bu günlərdə baş məşqçi Massimiliano Alleqrini qovmağı planlaşdırmır.

Futbolxeber.az saytının İtaliya mətbuatına istinadən verdiyi məlumata görə, 55 yaşlı mütəxəssis ən azı noyabrda Qətərdə start götürəcək dünya çempionatına qədər klubdakı fəaliyyətini davam etdirəcək. Yalnız fasilə zamanı klub rəhbərliyi Alleqrinin işinə qiymət verəcək.

Qeyd edək ki, dünən Çempionlar Liqasının 5-ci turunda “Benfika”ya uduzan “Yuventus” son turun nəticəsindən asılı olmayaraq qrupda qalıb. Bununla da “Qoca Sinyora” 2014-cü ildən sonra ilk dəfə ÇL-in pley-off mərhələsində iştirak etməyəcək.

Bu səbəbdən də azarkeşlər Alleqrinin qovulmasını istəyirlər. Hətta təcrübəli mütəxəssisin gedişi üçün sosial şəbəkələrdə #AllegriOut həştəqi də yaradılıb.

Əlavə edək ki, A seriyasında “Yuventus” 11 turdan sonra 19 xalla 8-ci pillədə qərarlaşıb.