İnyesta “Barselona”ya qayıtmaq istəyir

Andreas İnyesta yenidən “Barselona”ya qayıtmaq istəyir.

Futbolxeber.az saytının məlumatına görə, hazırda Yaponiyanın “Vissel Kobe” klubunda forma geyən 38 yaşlı yarımmüdafiəçi bununla bağlı deyib:

“Futbolçu kimi “Barselona”da dövranım artıq bitib. İndi fiziki cəhətdən güclü olan gənc futbolçularla rəqabət aparmağım mümkünsüzdü. Amma gələcəkdə Kataloniya klubuna məşqçi, yaxud idman direktoru kimi qayıtmaq arzusundayam. Təbii ki, nələrin olacağını zaman göstərəcək”.

Qeyd edək ki, İnyesta 2002-2018-ci illər aralığında “Barselona”nın formasını geyib. Bu müddətdə o, 9 dəfə İspaniya çempionatının, 6 dəfə ölkə kubokunun və 4 dəfə Çempionlar Liqasının qalibi olub.

2018-ci ilin mayında İnyesta Yaponiyanın “Vissel Kobe” klubu ilə müqavilə imzalayıb. 3 illik sözləşməyə əsasən təcrübəli yarımmüdafiəçi 90 milyon avro qazanıb. Ötən il İnyesta Yaponiya klubu ilə müqaviləsini daha 2 illiyinə uzadıb.