Ramosdan unikal göstərici: 650-ci oyun, 100-cü qol

La Liqanın son turunda “Leqanes”lə oyunda (2:2) “Real”ın qollarından birini Serxio Ramos vurub.

Futbolxeber.az saytının xarici KİV-ə istinadən verdiyi məlumata görə, bu, təcrübəli müdafiəçinin klub karyerasında 100-cü qoldu. Ramos 97 dəfə hazırkı klubunun, 3 dəfə isə “Sevilya”nın heyətində fərqlənib.   

34 yaşlı müdafiəçi “Real”ın heyətində 72 dəfə La Liqada, 7 dəfə İspaniya kubokunda, 13 dəfə Çempionlar Liqasında, 2 dəfə İspaniya Superkubokunda, 2 dəfə UEFA Superkubokunda, 3 dəfə də Klublararası Dünya çempionatında qol vurub.  

“Leqanes”lə görüş Ramos üçün daha bir yubileylə yadda qalıb. Belə ki, o, bütün turnirlər nəzərə alınmaqla 650-ci dəfə “Real”ın heyətində meydana çıxıb. Bu göstərici ilə Ramos klub tarixində 4-cü pillədə qərarlaşıb. O, Raul (741 oyun), İker Kasilyas (725) və Manuel Sançisdən (710) geri qalır.