“Bəxtimiz gətirmədi” - “Kopenhagen”in baş məşqçisi

“Biz bu gun yaxşı oynadıq. 6-7 qol imkanı əldə etdik. Rəqibin isə 2 belə imkanı oldu və bu şansdan yaxşı istifadə edərək onlardan birini qola çevirdi”.

Futbolxeber.az saytının məlumatına görə, bu sözləri “Kopenhagen”in baş məşqçisi Stal Solbakken “Qarabağ”la Çempionlar Liqasının pley-off mərhələsinin cavab oyunundan sonra deyib.

O bildirib ki, komandasının cavab matçında bəxti gətirməyib: “Biz oyunda üstünlüyə yiyələndiyimiz vaxtda Santander zədələndi. Onu müəyyən müddətə itirə bilərik”.

49 yaşlı məşqçi ümumilikdə komandasının oyunundan razılıq edib: “Əgər biz hər iki matçda da belə çıxış etsəydik, qrupa vəsiqə qazanardıq. Bugünkü matç barədə onu da deyə bilərəm ki, yaxşı oyun alındı”.

Xatırladaq ki, “Qarabağ” iki oyunun nəticəsinə əsasən (Bakıda 1:0, səfərdə 1:2) tarixində ilk dəfə Çempionlar Liqasının qrup mərhələsinə vəsiqə qazanıb.