“Barselona”dan son 11 ilin ən uğursuz startı

“Barselona” son 11 ildə İspaniya La Liqasına ən uğursuz şəkildə start verib. Futbolxeber.az saytının məlumatına görə, Luis Enrikenin komandası 7 turda 8 xal itirib.

21 mümkün xaldan 13-nü toplayan “Barsa” hazırda 13 xalla turnir cədvəlində 4-cü yeri tutur. Kataloniya klubu lider “Atletiko” və ikinci pillədə qərarlaşan “Real”dan 2, üçüncü olan “Sevilya”dan isə 1 xal geri qalır.

Xatırladaq ki, dünən “Barselona” “Selta”ya 3:4 hesabı ilə uduzub. Bu, “Barsa”nın cari mövsüm ölkə çempionatında ikinci yenilgisidir.