“Qəbələ”nin rəqibindən tarixə düşən transfer

Avroliqanın qrup mərhələsində “Qəbələ”nin rəqibi olan “Anderlext” heyətini gücləndirib. Futbolxeber.az saytının məlumatına görə, Belçika klubu Rumıniya millisinin və “Styaua”nın yarımmüdafiəçisi Nikolae Stankunu transfer edib. Keçidi “Styaua”nın prezidenti Cici Bekali də təsdiqləyib.

O qeyd edib ki, “Anderlext” 23 yaşlı futbolçuya görə 3,8 milyon avro ödəyib. Qarşıdakı 2 il ərzində Stanku oyunların 50 faizindən artığında meydanda olsa, o zaman “Anderlext” daha 2 milyon avro xərcə düşəcək.

Bununla da Nikolae Rumıniya çempionatının tarixinin ən bahalı transferi olub. Belçika klubu gənc futbolçu ilə 5 illik müqavilə imzalayıb.

Qeyd edək ki, Stanku son mövsümdə Rumıniya çempionatında 28 oyunda 12 qol vurub. Millidə isə o, 7 matçda 4 dəfə fərqlənib.