Azərbaycanlıları da geyindirən böyük firmanın kiçik klubu

Bütün çempionatların əsas bəzəyi ən yüksək zirvə, yəni çempionluq uğrunda mübarizədi. "Çempion kim olacaq, avrokuboklara kim gedəcək" sualları əsas diqqətləri ilk pillələrə yönəldir. Ancaq çempionatın "zirzəmi"sində bəzi klublar var ki, onları yuxarılar ümumiyyətlə maraqlandırmır. Onlar durduqları mövqenin başqalarına məxsus olduğunu bilirlər. Və çempionatın sonunu qorxuyla gözləyirlər. Bir növ kirayə haqqını ödəməmiş kirayəşinin evdən atılmaq qorxusu kimi. Bəziləri isə həsrətlə kirayəsini ödəyə bilməyən bu kirayəşinlərin "ev"inə göz dikir, həsrətlə onların yerində olmağı gözləyir. Bəs kimdi bu vaxtını gözləyənlər?

Söhbətin yəqin ki, aşağı liqalardan getdiyini anladız. Yüksək liqalara göz dikənlərin çoxu əvvəllər bu liqalarda çıxış edib, sonradan "ev"dən atılanlardı. Bu klublar çox vaxt aşağı liqada bir il "cəza" çəkdikdən sonra yüksək liqada yenidən peyda olurlar. Amma ikinci liqada elə klublar var ki, onlar heç vaxt güclülər arasında olmağın ləzzətini yaşamayıblar. Belə klublardan biri də hazırda İtaliya B seriyasında diqqətləri üzərinə çəkən "Karpi"di.

Kiçik şəhərin...

İtaliya B seriyasının lideri olan "Karpi" Avropanın ən güclü beş liqasından bir addımlıq məsafədə olsa da, istər heyət, istərsə də təmsil etdiyi şəhər baxımından demək olar ki, tanınmır. Əvvəlcə klubun təmsil etdiyi şəhərə nəzər salaq.

Tipik kiçik Avropa şəhəri olan Karpi İtaliyanın Emiliya-Romanya regionuna daxildi. Şəhərdə cəmi 71 min əhali yaşayır. Şəhərin əsası 752-ci ildə Lombardiya kralı Aistiuf tərəfindən qoyulub. Po çayının yaxınlığında yerləşən Karpi şəhəri öz adını bu çayın sahilində yetərincə geniş yayılmış vələs ağacından götürüb. Belə ki, Karpi latıncadan tərcümədə məhz vələs mənasını verir. Karpi şəhəri 1943-cü ildə İtaliyanı işğal edən faşist Almaniyasına müqavimətinə görə İtaliya dövləti tərəfindən "İgidliyə görə" medalıyla təltif edilib. Şəhər həmçinin İtaliyanın əsas parça istehsal edən mərkəzlərindən biri sayılır.

...kiçik klubunun...

Yazının qəhrəmanı olan "Karpi" klubunun əsası 1909-cu ildə qoyulub. Klub 20-ci illərdə indiki A seriyasının xələfi sayılan İtaliya çempionatında bir neçə mövsüm çıxış edir. Daha sonra isə klub davamlı olaraq C və D seriyalarında gün keçirməklə məşğul olur. 2000-ci ildə "Karpi" ciddi maliyyə böhranı keçirərək D seriyasına yuvarlanır. 2002-ci ildə yenidən dirçələn komanda 2013-cü ildən İtaliya B seriyasına yüksəlir. B seriyasında ilk mövsümündə 12-ci olan klubu pley-offdan cəmi 3 xal ayırır. Bu il isə klub ikinci liqada rəqib tanımır. B seriyasında əsas rəqibi "Bolonya"nı 6 xal qabaqlayan "ağ-qırmızılar" A seriyasına birbaşa vəsiqə qazanmağa çox yaxındı. Klub ev oyunlarının statistikasına görə birinci (13 oyun, 9 qələbə, 3 heç-heçə, 1 məğlubiyyət), səfər oyunlarına görə isə ikincidi (13 oyun, 5 qələbə, 6 heç-heçə, 2 məğlubiyyət).

"Karpi" ev oyunlarını kiçik "Sandro Kabassi" stadionunda keçirir. 1928-ci ildə əsası qoyulmuş stadionda 2012-ci ildə yenidənqurma işləri aparılıb. Stadionun tutumu cəmi 4144 nəfərdi.

...böyük iddiaları

Klubun birdən-birə sıçrayışa keçməsində maliyyə mənbəyinin rolu danılmazdı. Belə ki, komandanın yüksəlişi "Blufin" moda eviylə işbirliyindən sonra başlayıb. Karpi şəhərində yerləşən moda evinin illik gəlirləri 100 milyon avrodan artıqdı. Hazırda klubun formasında da məhz "Blufin"in əsas brendlərindən olan "Blumarine"nin reklamı yerləşdirilib. "Blufin"in dünyanın bir çox yerlərində "Blumarine" adında mağazaları var. Maraqlıdı ki, bu şəhərlər arasında Bakı da var.

"Karpi"oyunlara əsasən 4-5-1 taktiki sxemiylə çıxır. Qapını "Milan"dan icarəyə götürülmüş braziliyalı qapıçı Qabrielə etibar edən Kastori, müdafiədə əsasən Letizia-Qaqliolo-Suaqer-Struna dördlüyünə güvənir. Maraqlıdı ki, qapıçı da daxil olmaqla adını çəkdiyimiz müdafiə oyunçularından heç birinin yaşı 25-dən çox deyil. Bu gənc müdafiə xətti B seriyasında 21 qola üzülüb. "Byankorossi" bu göstəriciyə görə "Modena"yla birinci yerdədi.

 

Kastorinin yarımmüdafiə xəttindəki əsas silahları isə "Yuventus"un yetirməsi olan Raffaele Byanko, Lorenso Paskuiti, Filippo Porkari, Lorentso Lollo və Salvator Molinadı.

Klubun hücum xəttində isə hərdən yarımmüdafiədə də çıxış edən Antonio Di Qaudio və Roberto İnqlese olsa da, şübhəsiz, əsas silah Cerri Mbakoqudu. 22 yaşlı futbolçu Nigeriyada doğulsa da, 9 yaşından İtaliyada yaşayır. İtaliya vətəndaşı olan forvard cari mövsüm hələ ki, komandasının bombardiridi - 13 qol. Mbakoqu həmçinin komandasının ən bahalı futbolçusudu - 2,7 milyon avro.

 

Sadə heyətə, kiçik stadiona, kiçik şəhərə, az sayda azarkeşə sahib olan klub, böyük A seriyasına iddia edir. "Karpi" hazırda B seriyasında tarixiylə öyünən klubları geridə qoymaqla bu iddiaya layiq olduğunu sübut etməkdədi. Maraqlıdı, bu kiçik klub yüksək liqaya vəsiqə qazanacağı halda vaxtilə burda gözlənilməz qonaq təsiri bağışlayan və tezliklə buranı tərk edən "Komo" olacaq, yoxsa kənd komandası kimi qarşılandığı A seriyasında kök salan "Kyevo"?

 

Elnur Həmidov, Komanda.az