Karlo Ançelotti: “Buraxılan qoldan sonra başımızı itirmədik”

“Komandanın əzmkarlığını, çalışqamlığını və istəyini qeyd edə bilərəm. Buraxılan qoldan sonra başımızı itirmədik”. Futbolxeber.az-ın məlumatına görə, bu sözləri “Barselona” ilə oyundan sonra “Real”ın baş məşqçisi Karlo Ançelotti deyib.

Komandasının mövsümün ilk “El Klassiko”sundakı qələbəsini şərh edən italyan mütəxəssis futbolçuların sürətli oyununu vurğulayıb: “Hesabda geri düşdükdən sonra da, oyun planımız pozulmadı. Nəzərdə tutduğumuz kimi oynadıq. Bu da öz bəhrəsini verdi. Komandamın oyununda çox şeyi bəyəndim. Xüsusən də futbolçularımın sürətli oyununu görmək xoş idi. Mən ciddi və peşəkarlardan qurulmuş kollektivə rəhbərlik edirəm. Sərəncamımdakı hər bir futbolçu hansı komandada çıxış etdiyini bilir. Qalib gəldik, çünki bunu istəyirdik”.