XX mundialın iştirakçıları: KOLUMBİYA

20 gündən sonra Braziliyada sayca XX dünya çempionatı start götürəcək. Futbolxeber.az saytı oxucuları mundial iştirakçıları ilə yaxından tanış edir. Bu dəfə Kolumbiya millisindən söhbət açacağıq.

TARİXƏ SƏYAHƏT

Kolumbiya millisi uzun müddət dünya futbolundan təcrid olunmuş vəziyyətdə qalıb. Yalnız 1936-cü ildə Kolumbiya Futbol Federasiyası CONMEBOL-a üzv olub. 2 il sonra isə ölkə millisi ilk beynəlxalq oyununa çıxıb. 1938-ci ilin 10 fevralında Panamada baş tutan matçda Kolumbiya yığması Meksika ilə üz-üzə gəlib. Kolumbiyalıların siftəsi uğursuz alınıb və matç Meksikanın 3:1 hesablı qələbəsi ilə yekunlaşıb. İlk dəfə beynəlxalq turnirdə Kolumbiya millisi 1945-ci ildə iştirak edib. Amerika kubokunda Kolumbiya yığması Boliviya, Ekvador, Paraqvay və Perunu qabaqlamaqla 9 komanda arasında beşinci olub. Digər tərəfdən isə Kolumbiya millisi Argentina, Braziliya, Çili və Uruqvaydan açıq-aşkar səviyyə baxımından geri qalırdı.

1962-ci ildə Çilidə baş tutan dünya çempionatında Kolumbiya yığması iştirak etsə də, nəticələr ürəkaçan olmadı. Elə sonrakı dövrlərdə də komanda ciddi uğurlar yadda qalmadı.

1975-ci ildə Kolumbiya millisi Amerika Kubokunda finala kimi irəlilədi. Lakin burada 3 oyunun nəticəsinə görə kolumbiyalılar həmin vaxt heyətində Ektor Çumpitas və Teofil Kubilyas kimi əfsanəvi futbolçular olan Peru yığması qarşısında aciz qaldılar.

Kolumbiya futbolundakı ilk “qızıl dövr” 1987-ci il hesab olunur. Həmin vaxt ölkə yığması Amerika kubokunda üçüncü yeri tutdu. Ölkədə isə xeyli sayda istedadlı futbolçu yetişdi. Bu baxımdan Karlos Valderrama, Leonel Alvares, Luis Karlos Perea, Rene İqitanın, sonrakı dövrdən isə Viktor Aristisabal, Oskar Kordoba, Fərdi Mondraqon, İvan Ramiro Kordoba kimilərin adını qeyd etmək olar.

Məhz adıçəkilən futbolçuların sayəsində Kolumbiya əsas uğurlarını 80-cı illərin sonu, 90-cı və 2000-ci illərin əvvələrində qazandı. Fransisko Maturanın rəhbərliyi altınbda komanda DÇ-1990 və DÇ-1994-də mübarizə apardı, eləcə də 2001-ci ildə Amerika kubokunu qazandı.

Son illər ardıcıl gələn uğursuzluqlara isə Kolumbiya millisi cari seçmə mərhələdə son qoydu. Ötən il oktyabrın 11-də Çili ilə 3:3 hesabı ilə başa çatan heç-heçədən sonra Kolumbiya yığması DÇ-2014-ə vəsiqəni rəsmiləşdirdi.

UĞURLAR

Kolumbiya millisi tarixi ərzində yalnız 1 dəfə ciddi uğur qazana bilib. Belə ki, 2001-ci ildə Maturanın rəhbərliyi altında Kolumbiya millisi Amerika Kubokunun qalibi olub. Bundan başqa komanda 3 dəfə (1987, 1993 və 1995-ci illərdə) Amerika Kubokunun bürünc medalını qazanıb. 

REKORDÇULAR

Kolumbiya millisinin tarixində ən çox oyun keçirən futbolçu Karlos Valderramadır. O, 1985-1998-ci illərdə yığmanın heyətində 111 oyunda meydana çıxıb və 12 qol vurub. İkinci pillədə qərarlaşan Leonel Alvaresin aktivində 101 oyun var. 1985-1997-ci illərdə yığmanın formasını daşıyan futbolçu 1 dəfə rəqib qapısına yol tapıb.      1990-2001-ci illər aralığında millinin şərəfini qoruyan Freddi Rinkon isə 84 oyunda 17 dəfə fərqlənib. Yığmada ən çox qol vuran futbolçu Arnoldo İquarandır. O, 25 dəfə rəqib qapılarına yol tapıb. Aspirilyanın aktivində 20, millidə çıxışını davam etdirən Radamel Falkaonun aktivində isə 17 qol var.

KOLUMBİYA YIĞMASI MUNDİLLARDA

1930 və 1934-cü illərdə baş tutan dünya çempionatlarından kənarda qalan Kolumbiya millisi DÇ-1938-in seçmə mərhələsində iştirak etsə də, mundialın final mərhələsinə vəsiqə qazana bilməyib. DÇ 1950, DÇ 1954 və DÇ 1958-dən də kənarda qalan Kolumbiya yığması nəhayət 1962-ci ildə ilk dəfə mundiala yüksələ bilib. Amma komanda mübarizəni elə ilk mərhələdə dayandırıb. Növbəti 6 mundialı da kənardan izləyə bilməyən Kolumbiya 1990-cı ildə nəhayət ki dünya çempionatına vəsiqə qazanıb. Özü də İtaliyada baş tutan mundialda komanda tarixində ilk və son dəfə 1/8 finala adlayıb. 1994 və 1998-ci illərdə də mübarizəni qrup mərhələsində dayandıran cənubi amerikalılar 2002-2010-cu illər aralığında baş tutan 3 mundialı da kənardan izləyib.

ƏLA PÜŞK VƏ TƏQVİM

Püşkatma zamanı ilk səbətdə yer alan Kolumbiya millisinin rəqiblərini ideal adlandırmaq olar. Çünki qrupda çox ciddi rəqibin olmaması səbəbindən Kolumbiyanın bəxtini gətirdiyini söyləmək olar. Hər halda Yunanıstan, Fil Dişi Sahili və Yaponiya ilə mübarizədə əsas favorit məhz cənubi amerikalılardır.

Kolumbiya millisi turnirdə ilk oyunu iyunun 14-də Yunanıstana qarşı keçirəcək. “Mineyran” stadionunda baş tutacaq matçın ardınca Kolumbiya, Fil Dişi Sahili ilə üz-üzə gələcək. Bu oyun iyunun 19-da, “Mərkəzi stadion”da baş tutacaq. Qrupdakı son oyununu isə Kolumbiya iyunun 24-də Yaponiyaya qarşı keçirəcək.