“Atletik” 16 illik həsrətə son qoydu

İspaniya La Liqasında 36-cı turun açılış matçında “Atletik” səfərdə “Rayo Valekano”nu 3:0 hesabı ilə darmadağın edib. Futbolxeber.az-ın məlumatına görə, bu nəticəylə Bilbao klubu həm çempionatda dördüncü yeri, həm də növbəti mövsümdə Çempionlar Liqasında iştirakı özü üçün təmin edib.

Hazırda “Atletik”in aktivində 68 xal var. 5-ci pillədə qərarlaşan “Sevilya” da mövsümü 68 xalla başa vura bilər. Lakin şəxsi oyunlardakı üstünlüyə görə, (1:1, 1:3) istənilən halda dördüncü yer “Atletik”ə qismət olacaq.

Bununla da “Atletik” 16 ildən sonra ilk dəfə olaraq Çempionlar Liqasında vəsiqə qazanıb. Bask təmsilçisi sonuncu dəfə ÇL-də 1998/99 mövsümündə iştirak edib. Həmin vaxt “Atletik” “Yuventus”, “Qalatasaray” və “Rusenborq”la eyni qrupda yer almışdı.