Ərəblərin növbəti hədəfi - NBA

Avropanın aparıcı futbol klublarına sahib çıxan ərəb biznesmenlərin növbəti hədəfi Milli Basketbol Assosiasiyası - NBA-dı.

Futbolxeber.az saytının xarici KİV-ə istinadən verdiyi məlumata görə,

“Mubadala Investment” (Abu-Dabi) və “Qatar Investment Authority” (Qətər) şirkətləri NBA klublarının aksiyalarına sahib çıxmaqda maraqlıdırlar.

“Bloomberg” portalının iddiasına görə, ərəb investorlar “Nyu-York Niks” klubu ilə yaxından maraqlanır. Bu satışı asanlaşdıracaq amil də var. Belə ki, Nyu York klubunun hazırkı sahibi Ceyms Dolan MSGS korporasiyasına rəhbərlik edir, hansı ki, bu şirkət “Abu Dhabi United Group”la əlaqəlidi.

Digər tərəfdən, qaydalara görə, dövlət təşkilatları NBA klublarının səhmlərinin yalnız 20 faizinə yiyələnə bilər.

Qeyd edək ki, daha əvvəl “Qatar Investment Authority” “Finiks” klubunun satışında iştirak etsə də, sonda istəyinə çata bilməmişdi.

Adil ƏHMƏDOV