“Bakı-2015”: Snayperlərimiz yenə hədəfə düşə bilmədilər

Bu gün Bakı-2015 I Avropa Oyunlarının atıcılıq yarışları davam edir. Futbolxeber.az-ın məlumatına görə, Bakı Atıcılıq Mərkəzində 3 növdə yarışlar keçirilir.

Həm kişilər, həm qadınlar 10 metrdən pnevmatik tapançadan atəş açmaqda, həmçinin kişilər səngər stendində qüvvəsini sınayır. Hər 3 növdə əvvəl təsnifat mərhələsində çıxış edən idmançılar ardından mükafatçıları müəyyənləşdirəcək.

Bu gün keçirilən yarışlarda çıxış edən Azərbaycan təmsilçiləri üçün mübarizə erkən birib. Belə ki, hər növdə 2 snayperimiz çıxış etsə də, onlardan heç biri finala adlaya bilməyib.

Qadınların 10 metrdən pnevmatik tapança ilə atəş açmaq yarışlarında Azərbaycanı iki snayper təmsil edib. Lakin İradə Aşumova və Nərminə Səmədovanın çıxışı uğursuz alınıb.

Belə ki, hər iki snayperimiz təsnifat mərhələsində mübarizəni dayandırıb. 36 idmançının qatıldığı mərhələdə Aşumova 273 xalla 26-cı, Səmədova 360 xalla 35-ci yeri tutub. Final mərhələsinə yalnız ilk 8 yerin sahibi yüksəlib.

Kişilərin səngər stendində 2-ci təsnifat mərhələsi keçirilib. Ölkəmizi təmsil edən Elvin İsmayılov və Əlimirzə Quliyev yarışda uğursuz çıxış edib. 1-ci təsnifat mərhələsində 69 xalla 27-ci olan Quliyev yekun siyahıda 107 xalla sonuncu - 32-ci olub. İlk təsnifatı 68 xalla 31-ci tamamlayan İsmayılov isə 109 xal toplayaraq, mövqeyində qalıb. Final mərhələsinə 6 ən yaxşı snayper yüksəldiyindən təmsilçilərimiz çıxışını başa dayandırmalı olub.

Kişilərin 10 metrdən pnevmatik tapança ilə atəş açmaq yarışlarında Ruslan Lunyov və Rəsul Məmmədov da hədəfə düşə bilməyib. Lunyov 574 xalla 19-cu olub. O, finala vəsiqə verən 8-ci pillədən 5 xal geri qalıb. 33 idmançı arasında 32-ci olan Məmmədov isə 552 xal toplayıb.

Mənbə: apasport.az