Takevandoçumuz: “Azarkeşlərin fəal dəstəyi ilə finala çıxmaq istəyirəm”

“İlk görüşümü ötən il Avropa çempionatının gümüş mükafatçısı olan idmançıya qarşı keçirdim və qalib gəldim. Növbəti qarşılaşmada ispaniyalı atlet, London Olimpiadasının qalibi, Avropa və dünya çempionu Joel Bonilla Qonzalez ilə üz-üzə gələcəyəm. Düşünürəm ki, çətin və gərgin döyüş olacaq. Amma doğma Vətənimdəyəm və əlimdən gələni edib azarkeşlərin köməyi ilə finala çıxmaq istəyirəm. Ona görə azarkeşlərin dəstəyini gözləyirəm. Rəqibimin güclü olmasına baxmayaraq, qələbə qazanmağa çalışacağam”. Futbolxeber.az-ın məlumatına görə, bu “Azərtac”a müsahibəsində kişilər arasında taekvondo yarışında 1/4 final mərhələsinə yüksələn Ayxan Tağızadə (-68 kq) deyib.

İdmançımız yarımfinala adlamaq istədiyini bildirib: “Əgər ispaniyalı rəqibimi məğlub etsəm, növbəti görüşümdə rusiyalı idmançı ilə revanş döyüşünə çıxacağam. Çünki rusiyalı rəqibimə dünya çempionatında uduzmuşdum. Ona görə rusiyalı rəqibimdən revanş almağa çalışacağam".