Azad Rəhimov: “İstəmərəm ki, siyasət idman qarışsın”

“Yarışlar gərgin keçir. Hazırda yığmamız 19 medalla 2-ci yerdədi”. Futbolxeber.az-ın məlumatına görə, bunu gənclər və idman naziri Azad Rəhimov deyib.

Bakı-2015 Avropa Oyunları Əməliyyatlar Komitəsinin (BAOƏK) baş icraçı-direktoru bu gün “Hilton” otelində mətbuat konfransı keçirib.

O bildirib ki, Avropa Oyunlarının baş tutmasında böyük əməyi olan Avropa Olimpiya Komitəsinin prezidenti Patrik Hikki dövlət başçısı tərəfindən qəbul olunub: “Ölkə prezidenti İlham Əliyev Patrik Hikkini qəbul edib. Bu Oyunların keçirilməsində Patrik Hikinin əməyi böyükdü. Bu sevinci Avropaya o bağışlayıb. Cənab prezident 70 yaşı tamam olması münasibətilə onu “Şərəf” ordeni ilə təqdim edib. Onu ürəkdən təbrik edirəm”.

Nazirin sözlərinə görə, Oyunlara marağı artırmaq üçün işlər yüksək səviyyədə təşkil edilib: “İkinci və ya üçüncü Avropa Oyunlarında belə yüksək təşkilatçılıq gözləmirəm. Bəlkə həmin vaxt heç belə açılış mərasimi olmadı. Avropalı idmançılar rahat yatırlar, yeyirlər, yarışlara vaxtlı-vaxtında gətirilirlər. Onlar da əzmkarlıqla iştirak edib, medal qazanmalıdırlar. İstərdim ki, gələcəkdə Oyunlarda dünya rekordu qırılsın”.

Rəhimov qeyd edib ki, idmanın siyasiləşməsinin əleyhinədi: “Bu, çox neqativ haldı. İstəmərəm ki, siyasət idman qarışsın”.

Nazir bildirib ki, Mədəniyyət Nazirliyi və digər müvafiq qurumlar müxtəlif tədbirlər keçirirlər: “Teatrlar, maraqlı sərgilər, tamaşalar görə bilərsiniz. Həmçinin Mədəniyyət Nazirliyi açıq səma altında kiçik konsertlər keçirir. Oyunlardan əvvəl baxanda görürdük ki, cədvəl sıxdı. Amma insanlar bunlara da maraq göstərirlər”.

Mənbə: apasport.az