Teymur Rəcəbov: "Rəqibin debütündən sonra yaxşı vəziyyət almadım"

Bakıda keçirilən şahmat üzrə Qran-Pri turnirində 8-ci turda Teymur Rəcəbov Yevgeniy Tomaşevskiylə heç-heçə oynayıb. Futbolxeber.az-ın məlumatına görə, partiyadan sonra Rəcəbov jurnalistlərin suallarına cavab verib: "Rəqibin debütündən sonra yaxşı vəziyyət almadım. Əlbəttə, vəziyyətləri təhlil etmişdim. Belə vəziyyətlərdə çox oyunlarım olub. Heç-heçə bu oyun üçün normal nəticədir. Fikrimcə hələlik turnir cədvəli haqda danışmaq düzgün deyil. Qarşıda 3 tur var. Üstəlik Qran-Prinin digər iki mərhələsində də oynayacam. Yalnız sonda iddiaçılar turnirinə yollanan şahmatçıların adı məlum olacaq”.

Yevgeniy Tomaşevskiy isə nəhayət Bakı Qran-Pri turnirində ilk qələbəsini qazanmaq arzusunda olduğunu deyib: "Turnirdə ancaq heç-heçə oynayıram. Ona görə bu gün qələbə qazanmaq istəyirdim. Heç-heçələrim çoxdur. Bir vacib gedişə ehtiyac var idi. Həmin gedişi tapa bilmədim. Müxtəlif gedişlər var idi. Sadəcə düzgün yolu tapmaq lazım idi. Təəssüf ki, lazımi çıxış yolu tapılmadı. Heç-heçə normal nəticədir. Son turlarda nəhayət qələbə qazanmağa çalışacam”.