Teymur Rəcəbov: “Əhəmiyyətli turnirdə oynadığımdan bayram barədə düşünməyə vaxt olmur”

Azərbaycanlı qrossmeyster Teymur Rəcəbov Bakıda keçirilən FİDE Qran-Prisinin üçüncü turunda Pyotr Svidlerlə heç-heçə oynadığı partiyanı şərh edib. Futbolxeber.az-ın məlumatına görə, Rəcəbov rəqibin çaşdırıcı gedişlər etdiyini bildirib: “Açılış maraqlı alındı. Daha sonra rəqibin çaşdırıcı gedişləri var idi. Vəziyyəti dəyişməyə çalışdım. Bəzi gedişlər üzərində xeyli düşündüm. Amma yekunda heç-heçəyə razılaşdıq”.

Rəcəbov “ilk 3 turdakı çıxışınız necə dəyərləndirirsiniz” sualını belə cavablandırıb: “Bu haqda danışmaq məncə erkəndi. Çünki cəmi 3 tur oynanılıb. Oyundan oyuna da fərq olur. Qarşıda hələ xeyli partiya var. Sona kimi uğur qazanmaq üçün əlimdən gələni edəcəyəm”.

Teymur Rəcəbov Qurban bayramı münasibəti ilə Azərbaycan xalqını təbrik etməyi də unutmayıb: “Xalqımızı bayram münasibəti ilə təbrik edirəm. Biz də bayramı hamı kimi qeyd edirik. Ümumiyyətlə bayramlara, ad günlərinə, xüsusi ziyafətlərə çox vaxt ayırmaq olmur. Çünki mənim üçün əsas olan yarışlardı. Hazırda çox əhəmiyyətli turnirdə mübarizə aparıram. Odur ki, bayram barədə düşünməyə vaxt olmur”.