Ağırlıqqaldırma Federasiyası 8 nəfəri qovdu

Gənclər və İdman Nazirliyi ilə Milli Olimpiya Komitəsi (MOK) 18 ağırlıqqaldıranımızın dopinq qalmaqalı səbəbindən cəzalandırılması ilə əlaqədar bəyanat yayıb. Nazirliyin mətbuat xidmətindən Lent.az-a verilən məlumata görə, sənəddə baş verənlərdən məyusluq ifadə edilib.

 

Nazirlik yaranmış durumla əlaqədar MOK və Azərbaycan Ağır Atletika Federasiyası (AAAF) ilə birgə problemin həlli istiqamətində səylər göstərdiyini açıqlayıb. AAAF 8 üzvünün işdən uzaqlaşdırılması ilə əlaqədar qərar qəbul edib. Onlar federasiya rəsmiləri, məşqçilər və yığmanın həkimidir. Hazırda federasiya tərəfindən araşdırmalar davam etdirilir. Araşdırma nəticəsində lazım gələrsə, yaranmış problemdə məsuliyyəti olan digər şəxslərin də qurumdan uzaqlaşdırılacağı bildirilir.

 

Nazirlik və MOK-un araşdırmalarının əsas istiqamətlərindən biri isə idmançılardan 2013-cü ilin aprel, iyun və sentyabr aylarında idmançılardan götürülmüş dopinq-testin müsbət nəticə verməsinə baxmayaraq, cavabların bir il sonra Beynəlxalq Ağırlıqqaldırma Federasiyasının rəsmi səhifəsində yer almasıdır. Digər araşdırılması tələb olunan sual isə idmançılarımızın dopinq-testdə ilişmələrinə rəğmən, beynəlxalq yarışlara buraxılmasıdır. Bu və digər suallar araşdırılması üçün müvafiq qurumlara göndərilib.

 

Qeyd edək ki, “İdman haqqında” Qanuna 2010-cu ildə edilmiş əlavələrdə dopinqdən istifadə cəzaları əksini tapıb. Belə idmançıların 2000 manat cərimələnməsi və ya 2 ilədək azadlıqdan məhrum edilməsi nəzərdə tutulub.