Hafiz Məmmədov Luvru ziyarət etdi

"Bakı" futbol klubunun prezidenti Hafiz Məmmədov Fransada işgüzar səfərdədir. Qol.Az-ın məlumatına görə, dünən klubun prezidenti dünyaca məşhur Luvr muzeyinin Lans şəhərində yerləşən filialını ziyarət edib. Ziyarət zamanı Hafiz Məmmədovu Nor Pa de Kale regionunun başçısı Daniel Perşeron (Daniel PERCHERON), Lans şəhərinin meri Silven Rober (Sylvain ROBERT), "Lans" klubunun prezidenti Jerve Martel (Gervais MARTEL) müşaiyət ediblər.

Lans-Luvrda fəxri qonaqları qarşılayan muzey direktoru, tanınmış sənətşünas Ksavye Dekto (Xavier DECTOT) Luvr muzeyin tarixi və 2012-ci ildən fəaliyyət göstərən Lans bölməsində sərgilənən eksponatlar barədə ətraflı məlumat verib.

II Luvr adlandırılan və Luvr muzeyinin ilk rəsmi filialı kimi tanınan Luvr-Lans muzeyinin ildə 450-500 min adam tərəfindən ziyarət olunduğunu bildirən sənətşünas 20 hektar ərazidə yerləşən kompleksin SANAA Yaponiya arxitektura bürosunun layihəsi əsasında tikildiyini deyib.

Ətraflı gəzinti zamanı qonaqlar Luvr muzeyindən gətirilən 205 nadir eksponatla tanış olmaqla yanaşı, şüşəli pavilyon, 120 metrlik Zaman qalereyasını izləyiblər. Burada IV əsrdən 1850-ci ilə qədər yaşayıb-yaratmış sənət ustalarının rəsm və skulpturaları yerləşdirilib.  

"Bakı"nın prezidenti Hafiz Məmmədov Luvr muzeyinin ardından "Lans" klubunun arenası "Feliks Bollar" stadionuna dəvət olunub. "Lans" klubunun prezidenti Jerve Martel stadion və infrastruktur barədə ətraflı məlumat verdikdən sonra qonaqlar klub muzeyinə baş çəkiblər.