Qustavo Klisman: “Vurduğum iki qolu “Neftçi”nin qələbəsinə dəyişərdim”

“Neftçi”nin yarımmüdafiəçisi Qustavo Klisman Azərbaycan Premyer Liqasının 8-ci turunda “Qarabağ”a qarşı keçirilən oyundan sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Dramatik oyunu necə şərh edərdiniz?

- Meydandan 1 xalla ayrıldığımız üçün üzülürük. Qələbəyə çox yaxın idik. Yekunda 3 xalı əldən verdik. Buna baxmayaraq, göstərdikləri əzmkarlığa görə komanda yoldaşlarıma təşəkkürümü bildirirəm. Meydanda əlimizdən gələni etsək də, qələbə qazana bilmədik. Futbolda belə hallar olur.

- Konkretləşdirsək, qələbə üçün nə çatışmadı?

- Hazırda bu suala dəqiq cavab vermək çətindir. Düşünürəm ki, daha sakit başla matçı təhlil etdikdən sonra fikir bildirmək olar.

- “Neftçi” çempionluğa iddialı 2 komanda ilə görüşdə 2 xal qazandı, yoxsa 4 xal itirdi?

- Biz hər oyuna qələbə üçün çıxırıq. Çalışırıq bunu meydanda öz oyunumuzla da göstərək. Bəzən sən nə qədər çox istəsən də, sonda alınmır. Təbii ki, bu heç-heçəyə görə üzülürük, lakin irəli baxmaq lazımdır.

- Bu nəticədən sonra azarkeşlərə nə demək istərdiniz?

- Atmosfer möhtəşəm idi. Onlara təşəkkür edirəm. Azarkeşlər özlərini 12-ci oyunçumuz kimi göstərdilər. Hər matçda bizi bu şəkildə dəstəkləsələr, əla olar. Onların dəstəyi bizə çox yaxşı təsir edir.

- İki qol vurduğunuzu nəzərə alsaq, “Qarabağ”la görüşü karyeranızın ən yaxşı oyunlarından biri saymaq mümkündür?

- Əlbəttə. Çünki mənim mövqeyim elədir ki, hər oyunda qol vurmaq şansın olmur. Lakin bugünkü böyük matçda iki dəfə fərqlənə bildim. Bu, məni sevindirir. Lakin soruşsanız, deyərəm ki, bu iki qolu qələbəmizə dəyişərdim.

- “Sabah”, ardınca da “Qarabağ”. Ardıcıl iki oyunda bu cür güclü rəqiblərə qarşı mübarizə aparmaq nə dərəcədə çətin idi?

- Əlbəttə, çətin idi. Hər iki rəqib keyfiyyətli futbolçulardan təşkil olunub. Biz də oyunumuzla sübut etdik ki, onlardan heç də geri qalmırıq.

- “Neftçi” çempionluq mübarizəsindədir?

- İndidən çempionatın sonunu düşünməli deyilik. Oyundan oyuna irəli baxmaq lazımdır. Hər matçda da qələbə qazanmaq üçün çalışmalıyıq.