Şamaxıda jurnalistlər üçün media düşərgəsi təşkil olunub

Şamaxıda yerli və xarici media nümayəndələri üçün düşərgə təşkil olunub.

Futbolxeber.az saytının məlumatına görə, tədbirdə yerli media nümayəndələri ilə yanaşı, Türkiyə və Rusiyadan da dəvət olunmuş jurnalistlər iştirak edib.

İki gün davam edən tədbirdə əvvəlcə Avro-2020-nin Bakıda keçiriləcək 4 oyunu, bilet satışı, təşkilatçılıq məsələləri ilə bağlı ümumi təqdimat nümayiş olunub. Daha sonra jurnalistlərdən ibarət komandalar arasında atıcılıq, bilyard, boulinq və stolüstü tennis üzrə yarışlar keçirilib.

Xatırladaq ki, futbol üzrə Avropa çempionatının 60 illik yubileyi münasibətilə qitə birinciliyinin oyunları 12 şəhərdə - Sankt-Peterburq, London, Münhen, Bakı, Roma, Buxarest, Dublin, Kopenhagen, Bilbao, Qlazqo, Budapeşt və Amsterdamda təşkil olunacaq.

A qrupunun 3 oyunu, həmçinin, 1/4 final mərhələsinin 1 qarşılaşması Bakı Olimpiya Stadionunda keçiriləcək. Püşkün nəticəsinə əsasən, A qrupunda Türkiyə, İtaliya, Uels və İsveçrə milli komandaları yer alıb. Bakıda keçiriləcək oyunların təqvimini bir daha diqqətinizə çatdırırıq:

13 iyun, saat 17:00

Uels - İsveçrə

17 iyun, saat 20:00

Türkiyə - Uels

21 iyun, saat 20:00

İsveçrə - Türkiyə

4 iyul, saat 20:00

1/4 final oyunu

Futbolsevərlər www.euro2020.com/bakutickets keçidinə daxil olaraq, birbaşa bilet əldə edə bilər.