Cavid Hüseynovun məhkəməsi yenə təxirə salındı

Səbail Rayon Məhkəməsində jurnalist Rasim Əliyevin döyülərək öldürülməsi işi üzrə həbs edilən "Qəbələ"nin sabiq kapitanı Cavid Hüseynovun bu gün keçirilməli olan məhkəməsi təxirə salınıb. Futbolxeber.az saytının məlumatına görə, buna Cavid Hüseynovun vəkili Adəm Məmmədov vəsatətlə çıxış etməsi səbəb olub. Belə ki, A. Məmmədov R.Əliyevin anası Teyfurə Əliyeva və C.Hüseynovun anası Xalidə Hacıyevanın şahid qismində dindirilməsinin düzgün olmadığını qeyd edib. Vəkil bildirib ki, adıçəkilən şəxslər əvvəlki məhkəmə proseslərində iştirak etdiklərindən dindirilə bilməzlər. Hakim Elmar Rəhimov bunun həqiqət olub-olmadığını müəyyənləşdirmək üçün Teyfurə Əliyeva və Xalidə Hacıyevanı məhkəmə zalına dəvət edib. Cavid Hüseynovun anası faktı təsdiq etsə də, mərhumun anası məhkəməə iştirak etmədiyini bildirib. Bununla razılaşmayan Adəm Məmmədov dediklərinin həqiqət olduğunu sübut etməyə hazır olduğunu vurğulayıb. Bu səbəbdən də məhkəmə aprelin 6-na keçirilib.

Prosesdə həmçinin iş üzrə dövlət ittihamçısının dəyişdirildiyi də elan olunub. Yeni dövlət ittihamçısı Rauf Əsgərovdur.