“Sumqayıt”ın yeni transferi: “Azərbaycan Premyer Liqası çox çətin çempionatdır”

“Azərbaycan Premyer Liqası çox çətin çempionatdır. Liqada çox yaxşı futbolçular var. Burada olduğum üçün məmnunam. Əlimdən gələn hər şeyi edəcəm ki, “Sumqayıt”a kömək edim”.

Futbolxeber.az saytının məlumatına görə, bu sözləri “Sumqayıt”ın yeni transferi Mamadi Banqre Azərbaycan Premyer Liqasının V turunda “Şamaxı” ilə oyundan (1:1) sonra jurnalistlərin suallarını cavablandırarkən deyib.

Fransız futbolçu “Sumqayıt”da olmaqdan məmnunluğunu ifadə edib: “Azərbaycan haqda təəssüratlarım çox gözəldir. Burada olmaq xoşdur. Çalışacağam ki, ölkənizin gözəl yerlərini gəzim”.

25 yaşlı vinger yaxşı formada olduğunu bildirib: “Hazırda özümü yaxşı hiss edirəm. Sabiq klubumun heyətində mütəmadi oynayırdım. Bura gəlməmişdən qabaq son oyunuma 3 gün öncə çıxmışdım”.

“Azərbaycan Premyer Liqası gələcək karyeranız baxımından tramplin ola bilərmi?” sualını Banqre belə cavablandırıb: “Hazırda fikrim yalnız “Sumqayıt”la bağlıdır. Komandaya kömək etmək istəyirəm. Gələcəklə bağlı çox da düşünmürəm. Hər şeyi zaman göstərəcək”.