Lekler: “Bakı trasında yarışmaqdan zövq alıram”

“Bakıdakı yarışda rəqabətədavamlı olmaq üçün ilk növbədə sıralanma turunda yaxşı nəticə göstərməyimiz vacibdir”.

Futbolxeber.az saytının məlumatına görə, bu sözləri “Ferrari” komandasının pilotu Şarl Lekler Bakıda keçiriləcək Formula 1 Azərbaycan Qran-Prisi öncəsi təşkil olunmuş mətbuat konfransında deyib.

Onun sözlərinə görə, bu il sıralanma turu performans baxımından ən çox çətinlik çəkdikləri məqamdır: “Ona görə də orada rəqabətədavamlı olsaq, yarış üçün ümidliyəm. Amma bunun haqqında düşünməzdən əvvəl həftəsonuna yaxşı hazırlaşmalıyıq. Trasın temperaturu da böyük rol oynayacaq. Məncə, əsas diqqəti buna yönəltməliyik”.

Sürücü Bakı trasında yarışmaqdan zövq aldığını söyləyib: “Amma indiyədək yarışlar mənim üçün çətin keçib. Ümid edirəm ki, həftəsonu bunu düzəldə bilərik. Əvvəlki yarışlarda yaşadığımız uğursuzluqların trasla əlaqəli olduğunu demək ədalətli olmaz. Son bir neçə həftəsonunda bəzi məqamlarla bağlı çətinliklər yaşadıq və daha yaxşı iş görmək bizim əlimizdədir. Bakı Qran-Prisində bunun üçün çalışacağıq”.

Qeyd edək ki, Azərbaycan Qran-Prisi sentyabrın 24-26-da təşkil olunacaq.