Hardasan, ay inkişaf?..

Litva millisinin baş məşqçisi Edqaras Yankauskas bildirib ki, “Azərbaycanda prioritet klub futboludur, milli yox”. Tam haqlıdır. Çünki AFFA-da oturanlar, Azərbaycan futbolunu idarə edənlər, İcraiyyə Komitəsində yer alanların əksəriyyəti milli haqda düşünmür. Belə olmasaydı, legioner limitini ləğv etməzdilər. Biz zamanında bu qərarın yanlış olduğunu dedik, yazdıq, amma kimdir eyninə alan?! Əsas hansısa klubun məqsədinə çatması, “Qarabağ”ı devirmək idi...

Adını qoydular ki, guya limitin ləğvindən sonra bütün azərbaycanlı futbolçular ölkə xaricinə üz tutacaqlar, millimizin əksər üzvləri legioner həyatı yaşayacaqlar, bağ belə, bostan belə...

Artıq qərarın qəbul olunmasından bir ildən çox vaxt keçib. Ölkə xaricinə gedən kim oldu?! Toral Bayramov və Nəriman Axundzadə. Onların da legioner həyatı yaşamasına limitin ləğvinin heç bir aidiyyəti yoxdur. Hər ikisi “Qarabağ”ın heyətində özünü avrokuboklarda yaxşı tərəfdən göstərdi və xarici klubların diqqətini çəkdi. Lakin gedişat onu göstərir ki, bu gün ən üzdə olan futbolçularımızdan hesab edilən Toral da, Nəriman da yaxın gələcəkdə yenidən vətənə qayıdacaq. Çünki bəh-bəhlə əvvəl ABŞ-yə yola saldığımız, sonra “Türkiyə Superliqasına gəlir” deyə qürurlandığımız Nəriman tezliklə “Ərzurumspor”a lazım olmayacaq. “Dadaşlar” gün sayırlar ki, Axundzadəni yola salsınlar. O ki qaldı Torala, onun “Bursaspor”a gedişinə bəziləri ağız büzürdülər ki, nəyə görə Türkiyə birinci liqasına yollanır? Görünən isə odur ki, Bayramov hətta “Bursaspor”un belə əsas heyətinə düşməkdə çətinlik çəkir.

Limitin ləğvinin Azərbaycan futboluna, azərbaycanlı futbolçulara zərrə qədər də xeyrinin olmamasının başqa bir nümunəsi: yuxarıda adını çəkdiklərimizi çıxsaq, bu gün millimizin hansı üzvləri legioner həyatı yaşayır? Mahirdi, Renatdı, Antondu, Vüsaldı – onlar onsuz da illərdir ölkə xaricində çıxış edirlər. Anatoli Nuriyevdi, dərinə getsək, bizə heç bir aidiyyəti yoxdur, Rüfətdi, limit olanda da, olmayanda da Azərbaycanda klubunda əsas heyətdə oynayıb. Başqa kimsə var? Halbuki Türkiyədə, heç olmasa, birinci liqada Azərbaycan Premyer Liqasında limit olanda daha çox futbolçumuz çıxış edirdi.

Hörmətli Azərbaycan futbolunun başbilənləri, nə oldu bəs limitin ləğvindən sonra azərbaycanlı futbolçular ölkə xaricinə üz tutacaqdılar, futbolumuz irəli gedəcəkdi, millimiz rəqiblərini darmadağın edəcəkdi?! Hardadı o vəd etdiyiniz “qızıl dağlar”?!

Limitin ləğvinin tərəfdarları klub futbolunu bəhanə edirlər, “Sabah”ı nümunə göstərirlər. Bu da məntiqli deyil. Çünki “Qarabağ” limit olanda da ÇL-də qrupa düşüb, olmayanda da...

Limitin ləğvi həm də Azərbaycan çempionatının səviyyəsini aşağı salır. Bəli, məhz aşağı. Cari mövsümün ilk 6 turunda göründü ki, Azərbaycan Premyer Liqasının klubları arasında böyük uçurum var. İlk 5-lik – “Neftçi”, “Qarabağ”, “Turan Tovuz”, “Zirə” və “Sabah” var, bir də ikinci yeddilik. Bu iki qrup arasında fərq böyükdür. Cəmi 4-5 turdan sonra 5-ci və 6-cı yer arasında 15-20 xal fərq olacaq. Budur inkişaf???

İBRAHİM