Elnur Abdullayev: “Özümə və komandama güvənirəm”

“Başa düşürəm ki, məsuliyyətim böyükdür. Lakin mən özümə və komandama güvənirəm”.

Futbolxeber.az saytının məlumatına görə, bu sözləri “Səbail”in baş məşqçisi Elnur Abdullayev deyib.

Yeni mövsümdə I Liqada çempionluq şanslarını dəyərləndirən gənc mütəxəssis bütün rəqiblərə hörmətlə yanaşdıqlarını bildirib:

“Göstərilən etimada görə klub rəhbərliyinə minnətdaram. Biz bütün rəqiblərə hörmətlə yanaşırıq. Bizim üçün hər matç finala bərabər olacaq. Bilirik ki, rəqiblər də bizimlə görüşə fərqli hazırlaşacaqlar. Mövsüm çox çətin keçəcək. Lakin bizim qarşımızda konkret tapşırıq var”.

O, hazırlıq prosesindən də söz açıb: “Məşqlərimizin ilk hissəsini Bakıda keçirdik. Avqustun 10-da Türkiyəyə yollanacaq. Toplanış 2 həftə davam edəcək. Orada daha çox taktiki məşqlər edəcəyik və yoxlama görüşlərində gücümüzü sınayacağıq”.