Qurban Qurbanov: “Hücumda bir az aqressivlik çatmadı”

"Çox danışılası bir şey yoxdur. Rəqibi təbrik edirəm. Cavab oyununa hazırlaşmalıyıq".

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov UEFA Konfrans Liqasının 3-cü təsnifat mərhələsinin Kiyev "Dinamo"su ilə keçirilən ilk oyundan sonra təşkil edilən mətbuat konfransında deyib.

O, səfərdə keçirilən və 0:1 hesabı ilə uduzduqları matçı belə şərh edib: "Qarşımızda yaxşı müdafiə olunan bir komanda var idi. Bir az sürəti artırmalı idik. Bəlkə də, hava şəraiti imkan vermədi. Həddindən artıq isti idi. Futbolçuların üzərinə çox getmək istəmədik. Bakıya qayıdandan sonra oyunu tam analiz edəcəyik və cavab matçına hazırlaşacağıq".

-  Bu gün futbolumuzda əsas problemlərdən biri odur ki, yerli oyunçular azdır. Yerli futbolçuların azlığı və uşaq futbolunda infrastruktur problemləri ilə bağlı nə deyə bilərsiniz?

- Legioner limitinin ləğvi ilə bağlı Azərbaycan futbolunda müəyyən bir proqram və layihə icra olunur. Bunun özünü nə dərəcədə doğruldacağını görmək üçün bir az vaxt lazımdır. Ümumilikdə klublarımız Avropa turnirlərində heç də pis çıxış etmir, bir xeyli qələbələrimiz var, amma hazırda bu geniş və uzun mövzuya ətraflı cavab verə bilməyəcəyəm.

- Məğlubiyyətin əsas səbəbi nə oldu?

- Səbəblər demək olar. Kiçik bir texniki səhv oldu və qol buraxdıq. Ümumi olaraq müdafiədə heç də pis davranmadıq. Hücum xəttində bir az aqressivlik çatmadı.

- Abdullah Zubir heç də yaxşı formada deyildi və bəlkə də bu gün ən pis oyunlarından birini keçirdi. Zubiri bu gün təcrübəsinə görə oynatdınız, yoxsa oyuna hazır hesab etdiniz?

- Bu gün 11-likdə Zubirə ehtiyac var idi. Bir neçə hücumumuz Zubirin vasitəsilə qurulmalı idi.  Düzdür, 1-2-si alınsa da, tam alınmadı, amma hər bir halda Zubiri ilk 11-likdə düşünmüşdüm. Hansısa bir səbəb yoxdur. Sonda azarkeşlərimizə də təşəkkür edirəm ki, bizə burada dəstək verdilər.