“Şəfa”nın göyə sovurduğu 300 min manat

Əlirza Müştəbazadə - bu ad azərbaycanlı futbol azarkeşlərinə tanışdır. “Neftçi”nin yetirməsi olan qolkiper 2024/25 mövsümündə Azərbaycan Premyer Liqasında adından söz etdirməyi bacardı. “Səbail” həmin vaxt Premyer Liqada sonuncu olsa da, Müştəbazadə xüsusən də çempionatın qışdan sonrakı dövründə inamlı oyunu ilə yadda qaldı. Təsadüfi deyil ki, “Səbail”in qolkiperi əsas milli komandamıza qədər yüksəldi. O, 2025-ci ilin martında yığmaya dəvət aldı. Mövsüm başa çatdıqdan sonra “Səbail”in maddi durumu yaxşı olmadığı üçün Əlirza Müştəbazadə “Şəfa”ya üz tutdu. Təxminən 1 il əvvəl mətbuatda yazılanlara inansaq, o, “Şəfa” ilə 3 illik müqavilə imzaladı və bu müddətdə qolkiperin qazancı təxminən 300 min manat olacaq(dı).

Premyer Liqadan fərqli olaraq, Müştəbazadə I Liqada gözdən uzaq olsa da, yekunda istəyinə çatdı və komandası ilə birgə Premyer Liqaya yüksəldi. “Şəfa”nın çempionluğunda 24 yaşlı qolkiperin rolu heç də az deyil. O, mövsüm boyu 17 matçda meydana çıxıb və bunlardan 10-da qapısını toxunulmaz saxlayıb. Gəl ki, “Şəfa”da rəhbər və məşqçi dəyişikliyindən sonra Əlirza Müştəbazadənin klubdakı gələcəyi qeyri-müəyyəndir. Bunu bilmək üçün Məşədi İbad demişkən, “Tarixi Nadir”i yarıya qədər oxumağa ehtiyac yoxdur. Bu günə qədər “Şəfa” 5 transfer edib ki, onlardan da ikisi qapıçıdır. Komanda Nicat Mehbalıyevi və Məmməd Hüseynovu heyətinə qatıb. Belə çıxır ki, “Şəfa” indi Əlirza Müştəbazadəni üçüncü qapıçı kimi görür? Yoxsa o, komandanın əsas qapıçısıdırsa, klub rəhbərliyi ardıcıl iki qolkiper niyə transfer edib? Ehtiyatda oturtmaq üçün? Yaxud 1 il əvvələ qədər Premyer Liqada özünü yaxşı tərəfdən göstərən Əlirza Müştəbazadə nə vəziyyətə düşüb ki, indi onun üzərinə 2 qapıçı birdən transfer edilir?

Deyilənlərə inansaq, “Şəfa” rəhbərliyi Əlirza Müştəbazadənin xidmətində maraqlı deyil və onunla yolları ayırmaq istəyir. Gəl ki, qapıçının daha 2 illik müqaviləsinin varlığı və təzminat məbləğinin yüksək olması “Şəfa” rəhbərliyinin işini çətinə salıb. Görünən odur ki, “Şəfa” Emin Zamanov və Zahid Mərdanovdan fərqli olaraq, Əlirza Müştəbazadə ilə yolları asanlıqla ayıra bilməyəcək. Böyük ehtimalla, yekunda tərəflər razılığa gələcəklər. Amma olan havaya sovrulan yüz minlərə olacaq...

P.S. Bu yaxınlarda CBC Sportda qonaq olan Əfran İsmayılov “Şəfa”nın əvvəlki idarəçilərini qınayıb və futbolçularla ötən mövsüm uzunmüddətli – 2, yaxud 3 illik müqavilə imzalanmasının səhv addım olduğunu bildirib. Çox maraqlıdır, Əfran bəy doğrudan belə düşünür, yoxsa sadəcə keçmiş idarəçilərdən gileylənmək üçün bu cür fikir səsləndirib? Həqiqətən belə düşünürsə, onda belə çıxır ki, Əfran İsmayılovun “Şəfa”da işi həqiqətən də çox çətin olacaq. Çünki sadə məntiq var. Əgər “Şəfa” Əlirza Müştəbazadə, Nihad Quliyev, İsmayıl Zülfüqarlı kimi Premyer Liqa təcrübəsi olan futbolçulara uzun müddətli müqavilə təklif etməsəydi, onlar I Liqada oynayardılar? Əlbəttə ki, yox. I Liqaya gəlməkdənsə elə “Şamaxı”da, “İmişli”də, “Karvan-Yevlax”da necə deyərlər, başlarını girələyərdilər də. I Liqada nə gəzirdilər?..

İBRAHİM