Sınmaq yox, daha güclü olmaq lazımdır...

Möcüzə baş vermədi. Gözlənildiyi kimi, CAS “Turan Tovuz”un lehinə qərar çıxarmadı. Beləcə, Tovuz klubunun avrokuboklardan kənarda qalması rəsmiləşdi. Təbii ki, bu cür hadisənin yaşanması “Turan Tovuz”un rəhbərliyi üçün də, azarkeşlər üçün də çox üzücü haldır. Klub rəhbərliyinin bir il ərzində xərclədiyi milyonlar göyə sovruldu. Mövsüm boyu çəkilən zəhmət kimlərinsə səhlənkarlığı, məsuliyyətsizliyi ucbatından yerə vuruldu.

Təəssüf ki, geridə qalan müddətdə “Turan Tovuz”un üzləşdiyi vəziyyətlə bağlı doğru-dürüst açıqlama verən olmadı. Nə AFFA, nə də “Turan Tovuz” tərəfdən. Ortada ancaq müəyyən ittihamlar eşitdik. Bəziləri bu hadisəyə görə AFFA-nı, bəziləri “Zirə”ni, bəziləri “Turan Tovuz”un o vaxtkı rəhbərliyini günahlandırdı. Hətta az qala Bakıda normadan artıq yağan yağışa görə də günahlandırılan Elxan Məmmədovu ittiham edənlər də tapıldı. Amma reallıq başqadır. Birincisi, günahın bir hissəsi hazırda AFFA-da çalışanların boynundadır. Deyilənlərə inansaq, tezliklə assosiasiyada 1-2 nəfər bu məsələyə görə vəzifəsindən uzaqlaşdırılacaq. Bir başqa versiyaya görə isə bu məsələni gündəmə gətirən “Turan Tovuz”un sabiq rəhbərlərindən biridir. Uzun sözün qısası, suallar çoxdur, cavab isə yoxdur...

Avrokuboklarla bağlı qərar bəzi azarkeşləri pessimistliyə qərq edib. Fanatlar arasında bu hadisənin Ehtiram Quliyevi futboldan küsdürəcəyini düşünənlər də var. Lakin bu cür fikirləri yaxına buraxmaq olmaz. Bəli, avrokuboklara vəsiqə qazanıb kənarda qalmaq üzücüdür. Lakin bu cəza “Turan Tovuz”u sındıra bilməz. 1 illik çətinlikdir, ötüb keçəcək. Bu yaşananlar əksinə, Tovuz klubunu daha da gücləndirməlidir. Necə ki, baş məşqçi Kurban Berdıyev işinə ciddi yanaşır. Belə olmasaydı, komanda artıq yeni mövsümün hazırlıqlarına start verməzdi. Daha nəyisə dəyişmək mümkün deyil. İndi “Turan Tovuz” günahkarların tapılıb cəzalanmasına nail olmaqla yanaşı, həm də yeni mövsümdə daha güclü olmağın planlarını cızmalıdır. Nəzərə almaq lazımdır ki, qarşıdakı çempionat ötən mövsümlə müqayisədə daha çətin olacaq. Ona görə də komanda güclənməli, daha da yaxşı vəziyyətə gəlməlidir..

İBRAHİM