Vaxt “Kəpəz”in əleyhinə işləyir...

Mövsüm başa çatıb və hamı növbəti futbol ilini həyəcanla gözləyir. Lakin “Kəpəz”də yeni mövsümə hazırlıqla bağlı hələ də ciddi addımların atıldığı görünmür. Klubda rəhbərliyin dəyişəcəyi gözlənilir və sədr postuna Anar Abdullayevin gətiriləcəyi deyilir. Lakin bu məsələ hələ də rəsmiləşməyib.

Ən çox narahatlıq doğuran məqam isə baş məşqçi məsələsidir. Çünki komandanın gələcək heyətinin formalaşdırılması birbaşa yeni çalışdırıcının seçimi ilə bağlıdır. Digər klublar artıq transfer bazarında fəallıq göstərir, bəzi komandalar isə təlim-məşq toplanışlarının tarixlərini belə açıqlayıblar.

“Kəpəz” isə hələ də gözləmə mövqeyindədir. Halbuki hər keçən gün seçim imkanlarını azaldır. Gəncə futbol ictimaiyyəti klubun gələcəyi ilə bağlı qərarların daha tez qəbul olunmasını gözləyir. Çünki yeni mövsümün uğuru məhz bu günlərdə görülən işlərdən asılıdır.

"Kəpəz" üçün indiki zamanda ən ideal seçim Mahmud Qurbanovdur. Hər-halda Gəncə futboluna bələd olan Qurbanov, həm də doğulduğu şəhərdə sevilir. İtirilən zaman isə "Kəpəz"in ziyanına işləyir.

Futbolxeber.az