Şahin Diniyev: “Cənubi Koreya Meksikadan daha baxımlı oyun sərgilədi”

“Gözəl açılış oldu. İlk dəqiqədən hiss olundu ki, DÇ-2026-nın təşkilatçılığı yüksək səviyyədədir. Meksika millisi ev sahibi statusundadır və CAR-la oyunda güclü azarkeş dəstəyinə malik idi. Artıq bu qrupda ilk turun oyunları başa çatıb və düşünürəm ki, müəyyən fikir yürütmək olar”.

Futbolxeber.az saytına müsahibəsində bu sözləri milli komandamızın sabiq baş məşqçisi Şahin Diniyev deyib.

Təcrübəli mütəxəssis əvvəlcə Meksika - CAR (2:0) matçını dəyərləndirib: “CAR millisi səviyyə baxımından Meksikadan geri qalırdı. Hiss olunurdu ki, futbolçular fərdi qərar qəbul etməkdə problem yaşayırlar. Bəsit səhvlərə yol verirdilər. Meksika yığması da rəqibin səhvlərindən maksimum dərəcədə istifadə etdi”.

O, Afrika təmsilçisinin sürət baxımından rəqibindən geri qaldığını vurğulayıb: “Hər iki qol CAR yığmasının səhvindən sonra vuruldu. Birinci top itkisindən, ikinci isə müdafiəçinin mövqe səhvindən sonra. Bu da CAR millisinin üzvlərinin fərdi bacarığının istənilən səviyyədə olmamasından irəli gəlirdi. Ümumiyyətlə, afrikalılar sürət baxımından çatdıra bilmirdilər. Bu da həm səhvlərə, həm də qırmızı vərəqələrə gətirib çıxarırdı. Meksika millisi layiqli qələbə qazandı. Buna baxmayaraq, komandada boşluqlar var idi. Əsas da rəqibin əks-hücumları zamanı bu boşluqlar özünü büruzə verirdi”.

Diniyev ilk matçla müqayisədə Cənubi Koreya - Çexiya oyununun (2:1) daha maraqlı alındığını söyləyib: “Hər iki komanda yaxşı mübarizə aparırdı. Taktiki cəhətdən gözəl futbol izlədik. Cənubi Koreya intizam baxımından Çexiyanı üstələdi. Komanda məğlub duruma düşsə də, öz oyunundan əl çəkmədi, geridönüş edə bildi. İlk gündə izlədiyimiz 4 komanda arasında ən çox Cənubi Koreyanı bəyəndim. Oyun nizam-intizamı pozulmurdu, hər futbolçu nə etməli olduğunu bilirdi. Qapılarında qol görsələr də, panikaya düşmürdülər. Çox savadlı oynadılar. Çexiya yığmasında yaxşı futbolçular olsa da, özlərini tam göstərə bilmədilər. Bu da Cənubi Koreya yığmasının ağıllı oyunundan irəli gəlirdi. Bu matçın da nəticəsinin layiqli olduğunu düşünürəm. Cənubi Koreya yığması qələbəyə daha yaxın idi”.

Mütəxəssis ilk turdan sonra qrupdakı vəziyyəti belə dəyərləndirib: “Çexiyanın bu məğlubiyyətlə vəziyyəti pisləşdi. Bundan sonra çexlər hər iki oyunda qalib gəlməlidirlər. Düzdür, CAR-la oyunda favoritdirlər. Amma Meksika ilə görüş ölüm-dirim mübarizəsi olacaq. Düşünürəm ki, ilk turda sərgilənən oyunlara əsasən Meskika və Cənubi Koreya yığmalarının qrupdan çıxmaq şanslarının yüksək olduğunu söyləmək mümkündür. Ancaq futboldur, hər şey ola bilər. Bu cür turnirlərdə ilk oyunu uduzanda qrupdan çıxmaq şansın 50 faizdən də aşağı düşür. Cənubi Koreya Meksikadan daha baxımlı oyun sərgilədi”.

İBRAHİM