Təki “inamımız” “niyyətimiz” kimi puç olmasın...

Bu gün (Avstriyadan fərqli olaraq Bakıda artıq iyunun 9-dur) Azərbaycan millisi Avstriya toplanışında ikinci yoxlama oyununa çıxacaq. Ayxan Abbasovun rəhbərlik etdiyi yığmamız San Marino ilə üz-üzə gələcək. Dünən oyundan əvvəl təşkil olunan mətbuat konfransında millimizin baş məşqçisi “Sabah qalib gələcəyimizə inanırıq” deyib. Ayxan müəllim Malta ilə matçdan əvvəl də “hər iki görüşdə qələbə qazanmaq niyyətindəyik” demişdi. İnş Allah, millimizin inamı da niyyəti kimi puç olmaz.

Əslində isə sabahkı oyunun çəkisi çox aşağıdır. Yəni Sent Lüsiya üzərində qələbə millimizə nə veribsə, San Marino qələbəsi (inş Allah) də maksimum o olacaq...

Bunu deməklə millimizin gələcək qələbəsinə indidən kölgə salmaq fikrindən qəti uzağıq. Sadəcə San Marino ilə bağlı bəzi statistik göstəricilərə diqqət etmək belə düşünməyə əsas verir:

* San Marino tarixi ərzində keçirdiyi 228 oyunun 213-də məğlub olub, cəmi 3 qələbə qazanıb (üçü də Lixtenşteyn üzərində).

* Millimiz San Marino ilə bu günə qədər keçirdiyi iki oyunun ikisində də qalib gəlib. Topların fərqi də 6:1-dir.

* San Marino yığması qələbəyə həsrət qaldığı son 14 oyunda qapısında 51 qol görüb.

* San Marino 3 gün əvvəl öz meydanında FİFA reytinqində 181-ci olan Banqladeşə uduzub.

* Həmin matçda San Marino millisinin meydanda olan futbolçularından 5-i klubsuzdur, daha dəqiq desək, ancaq millinin heyətində forma geyirlər.

Lorenzo Kapiççioni sonuncu dəfə 2022/23 mövsümündə “Kosmos” klubunda çıxış edib.

Samuele Zannoni sonuncu dəfə 2020/21 mövsümündə “Kallunqo”da oynayıb.

Nikolas Giakopetti, Lorenzo Lazzari və Kristian Meloninin isə heç vaxt klubu olmayıb...

Biz də bu komandaya “Sabah qalib gələcəyimizə inanırıq”...

İBRAHİM