“Şahdağ Qusar”dan doğru seçim

Gözlənildiyi kimi, “Karvan-Yevlax”dan ayrılan Füzuli Məmmədovun işsiz günləri çox çəkmədi. Təcrübəli mütəxəssis yeni mövsümdə I Liqanın favoritlərindən olacaq “Şahdağ Qusar”la anlaşdı. Qusar klubunun yeni mövsümdə hədəfi çempionluq və avtomatik olaraq Premyer Liqaya vəsiqədir. Əminliklə söyləmək olar ki, “Şahdağ Qusar” hədəfə çatmaq yolunda ən vacib transferini reallaşdırdı.

Füzuli Məmmədov son iki mövsümdə istər “Mingəçevir”də, istərsə də “Karvan-Yevlax”da nəyə qadir olduğunu göstərməyi bacarıb. 2 il əvvəl mövsümün ortasında sonuncu – 10-cu pillədə qəbul etdiyi “Mingəçevir”i nəinki I Liqada saxlamağı bacardı, komanda hətta çempionatı dördüncü pillədə başa vurdu. O ki qaldı Yevlax klubuna, düzdür, komanda Premyer Liqada yerini qoruya bilmədi, amma istər azarkeşlərin, istər mütəxəssislərin ümumi fikri bu idi ki, məhz Məmmədovun gəlişindən sonra “Karvan-Yevlax” tam fərqli komandaya çevrildi. Əldə olunan qələbələr, sərgilənən oyun Məmmədovun aktivinə yazılmalıdır. Gəl ki, təcrübəli mütəxəssis komandanı qəbul edəndə artıq böyük ölçüdə qatar getmişdi...

Mövsüm yekunlaşdıqdan sonra çoxları Füzuli Məmmədovun “Karvan-Yevlax”da qalacağını gözləyirdi. Klub rəhbərliyi də mütəxəssislə iş birliyini davam etdirmək fikrində idi. Lakin Məmmədovla klubun iddiası üst-üstə düşmədi. Füzuli bəy iddiasız yerdə çalışmaq istəmədiyindən Yevlax klubunu tərk etdi. Bəzi məşqçilərdən fərqli olaraq Məmmədov iş xatirinə işləmək fikrindən uzaqdır. Bu məqam özü də mütəxəssisin xarakterli olmasının göstəricisidir. İndiki məqamda isə “Şahdağ Qusar”la Füzuli Məmmədovun iddiaları üst-üstə düşür. Klubun hədəfi Premyer Liqa olmasaydı, Füzuli Məmmədov təklifi qəbul etməzdi, yaxud da əksinə, iddia olmasaydı, heç “Şahdağ Qusar” ambisiyalı mütəxəssisə dəvət göndərməzdi. Odur ki, indidən əminliklə söyləmək olar ki, yeni mövsümdə I Liqanın əsas favoriti məhz “Şahdağ Qusar” olacaq...

TAĞI