“Sumqayıt”dan ayrılan Saşa İliç bu tanınmış klubu çalışdıracaq

Bir neçə gün əvvəl “Sumqayıt”ın yollarını ayırdığı Saşa İliçin yeni klubu müəyyənləşib.

Futbolxeber.az saytının məlumatına görə, serb mütəxəssis karyerasını vətənində davam etdirəcək. O, yetirməsi olduğu “Partizan”la anlaşıb.

Qeyd edək ki, ötən mövsüm “Sumqayıt”ı çalışdıran İliç mayın 26-da rəsmən vəzifəsindən ayrılıb. Onun rəhbərliyi altında “kimyaçılar” mövsümü 7-ci pillədə başa vurub.

“Partizan”ın yetirməsi olan 48 yaşlı mütəxəssis futbolçu karyerasına məhz Belqrad klubunda başlayıb. "Partizan” İliçin məşqçi karyerasında ikinci Serbiya klubu olacaq. O, daha əvvəl “Çukariçki”ni də çalışdırıb. “Sumqayıt”a qədər İliç, həmçinin, ÇSKA (Sofiya, Bolqarıstan), “Atromitos” (Yunanıstan) və “Pari NN” (Rusiya) klublarında işləyib.