Ehtiram Quliyev od püskürdü: “Suyu oturaraq içən hakimlərdən canımızı qurtarmalıyıq”

“Oyunu çox təəssüf hissi ilə qarşılayırıq. Xüsusən də, Əliyar Ağayevin təyinatı zamanı başımıza belə bir hadisənin gələcəyini ehtimal edirdik”.

Futbolxeber.az saytının məlumatına görə, bu sözləri “Turan Tovuz”un İdarə Heyətinin sədri Ehtiram Quliyev Azərbaycan kubokunun yarımfinal mərhələsinin ilk oyununda “Zirə”yə 0:2 hesabı ilə uduzduqları matçdan sonra deyib.

Jurnalistlərin suallarını cavablandıran klub rəhbəri görüşün baş hakimi Əliyar Ağayevdən sərt şəkildə narazılığını ifadə edib:

“Suyu oturaraq içən hakimlərdən canımızı qurtarmalıyıq. Suyu uzanaraq içsinlər, ayaq üstə içsinlər, tək ayaq üstə içsinlər, amma haqqımızı, oyunçuların haqqını içməsinlər. İl boyu çəkdiyimiz əziyyət bir gündə yerə vurulur. Bunlar dəyişməlidir. Xüsusən də, Əliyar Ağayevin “Turan Tovuz”un oyunlarına təyinatı zamanı belə halları gözləyirdik. Çempionatdakı oyundan sonra da “səhv etmişəm, insanıq” mesajı bizə göndərildi. Haqqımız, uşaqların alın təri Əliyar Ağayevin haramı olsun. “Zirə”nin qələbəsinə kölgə salmaq istəmirəm. Amma futbolumuzda bu şeylər dəyişdirilməlidir. Biriləri bəzi şeyləri dilə gətirməlidir. Biz dilə gətirmədikcə, səssiz qaldıqca, “Əliyargillər” belə oyunlar idarə edəcək, futbolumuzu bu günə qoyacaq. Yatırım etməyin də anlamı yoxdur. Belə çıxır ki, əziyyət çəkməyin də, oyunçu transfer etməyin də anlamı yoxdur, “Əliyargillər”dən canımız, futbolumuzun “can”ı qurtarmalıdır. Oyundakı epizodları hamınız gördünüz. Futbol ictimaiyyətinin görməsini istəyirəm. “Turan Tovuz” azarkeşlərinin səssiz qalmamasını istəyirəm. Artıq bu qədər olmaz. Bir mövsümlük əziyyətimiz boşuna gedir. İki toplanış etmişik, çoxlu investisiya etmişik. Amma Əliyar Ağayev kimilər bizə oynamaq imkanı vermir”.

- Hansısa addım atmaq fikrindəsiniz?

- Heç nə. Nə addım atacağıq ki?

- Sizcə, Əliyar Ağayev kiminsə sifarişini yerinə yetirir?

- Mən bilmirəm. Əliyar Ağayevin oyunlarına baxın, görəcəksiniz. Hamı bilir. Bunlardan canımızı qutarmalıdır. Kaş ki, suyu uzanaraq içərdilər. Suyu oturaraq içirlər ki, haramdır başqa cür. Bəs bu qədər futbolçunun haqqını yemək, hüququna toxunmaq halaldır? Evlərinə çörəyi necə aparırlar? Onlar bunu gözdən keçirsinlər. Hərə evinə apardığı çörəyi halallıqla aparmalıdır. Bütün haqqımız da haram olsun.