AFFA prezidenti PFL-in gələcəyi ilə bağlı: “...hər şey mümkündür”

Son zamanlarda gəzən şayiələrə görə yayda Peşəkar Futbol Liqası (PFL) ya ləğv olunacaq, ya da əvvəlki kimi Yarışların Keçirilməsi və Təşkili Departamenti adı altında bir kabinetdən ibarət quruma çevriləcək.

Bu gün AFFA-nın prezidenti Rövşən Nəcəf Hesabat Konfransından sonra mətbuat konfransı keçirib.

Tədbirdə Futbolxeber.az saytının əməkdaşı R.Nəcəfə PFL-in gələcəyi ilə bağlı sual ünvanlayıb. AFFA prezidenti qeyd edib ki, hazırda bu məsələ gündəmdə olmasa da, gələcəkdə hər şey mümkündür:

“PFL AFFA ilə müqavilə əsasında, assosiasiyanın verdiyi səlahiyyət çərçivsində yarış keçirir. PFL və AFFA arasında münasibət müqavilə əsasındadır. Hazırda PFL-in fəaliyyəti davam etdirilir, bu məsələ danışılmır. Lakin gələcəkdə hansısa dəyişiklik edilməsi, əlavə funksiyaların verilməsi, yaxud azaldılması mümkün məsələlərdir”.