Pedro Mateuş: “Milliyə yenidən dəvət almağımda Füzuli Məmmədovun böyük rolu var”

“Çətin oyun idi. “Zirə” hər nə qədər güclü olsa da, biz qalib gəlmək istəyirdik. Təəssüf ki, hakimlər idarəçiliyi istənilən səviyyədə deyildi. Bu da yekunda məğlubiyyətimizə gətirib çıxardı”.

Futbolxeber.az saytına müsahibəsində bu sözləri “Karvan-Yevlax”ın qapıçısı Pedro Mateuş Azərbaycan Premyer Liqasının 25-ci turunda “Zirə”yə 0:1 hesabı ilə uduzduqları oyun barədə danışarkən deyib.

O, qaçırılan qol epizodlarını şərh etmək istəməyib: “Ümumilikdə pis oynamadıq. Son turlar komandamızın inkişafı göz önündədir. İstər “Qəbələ”, istər “Sumqayıt”, istər “Araz-Naxçıvan”, istərsə də “Zirə” ilə matçlarda rəqibdən geri qalmırdıq. Məğlubiyyəti qaçırılan qol epizodları ilə əlaqədələndirməzdim. Ümumiyyətlə, komanda yoldaşlarımın çıxışını dəyərləndirmək istəməzdim. Udanda da komanda şəklində uduruq, uduzanda da”.

30 yaşlı qolkiper liqada qalmaq üçün sona qədər mübarizə aparacaqlarını vurğulayıb: “Düzdür, turlar keçdikcə şans azalır. Lakin biz sona qədər əlimizdən gələni edəcəyik. Növbəti turlarda “Kəpəz”, “Şamaxı”, “Qəbələ”, “İmişli” ilə oyunlarımız var. Həmin matçlarda vəziyyəti dəyişə bilərik”.

Pedro Mateuş yenidən San Tome və Prinsipi millisinə dəvət almasına da münasibət bildirib: “Əlbəttə, sevinirəm. Təbii ki, bunda “Karvan-Yevlax”dakı çıxışım böyük rol oynayıb. Milliyə yenidən dəvət almağımda məşqçilər korpusunun, xüsusən də Füzuli Məmmədovun böyük rolu var. Milli komandada yaxşı çıxış etmək üçün əlimdən gələni edəcəm”.