Breno Almeyda: “Neftçi” olaraq yalnız avrokuboklara fokuslanmışıq”

“Neftçi”nin yarımmüdafiəçisi Breno Almeydanın Futbolxeber.az saytına müsahibəsi

- Azərbaycan Premyer Liqasının XXV turunda “İmişli”ni 6:0 hesabı ilə darmadağın etdiniz. Böyük hesablı qələbəni necə şərh edərdiniz?

- Oyun komandamız üçün çox yaxşı keçdi. Gərgin, mübarizə dolu matç alındı. Meydana çıxan hamı öz gücünü ortaya qoydu və ən yaxşısını etdi. Bundan sonra isə qarşıdakı matçlara köklənməliyik.

- Həmin matçda "Neftçi"də ilk qolunuzu vurdunuz. Təəssüratlarınız necədir?

- Bəli, “İmişli” ilə matçda hesabı açdım. Həmçinin, yeni komandamda ilk qolumu vurdum. Mənə qol vurmağa şərait yaradan komanda yoldaşlarıma minnətdaram. Çox yaxşı iş gördük. Tanrıya sonsuz təşəkkürlər.

- "Neftçi"nin avrokuboklarda çıxış etmək şanslarını necə qiymətləndirirsiniz?

- Hələ də şanslar qalır. Bunun üçün çox çalışırıq. Məşqlərdə əlimizdən gələni edirik. "Neftçi" olaraq yalnız avrokuboklara fokuslanmışıq. Ən yaxşısını etmək üçün mübarizə aparırıq.

- Fasilədən sonra ilk oyununuz “Sumqayıt”a qarşı olacaq. Bu rəqib haqda məlumatınız var?

- Bəli, var. Ağır oyun olacaq. Ancaq “İmişli” ilə matçda olduğu kimi, həmin görüşdə də baş məşqçinin təlimatlarını meydanda çıxıb yerinə yetirməliyik. Belə davam etmək istəyirik.

Azad Nuriyev