Masaki Murata: “Bəlkə bu halda nəyisə dəyişə bildik”

“Oyun barədə nəsə demək çətindir. Bu matçda qalib gəlməli idik. Lakin bacarmadıq və uduzduq. Halbuki bu, bizim üçün finala bərabər qarşılaşma idi”.

Futbolxeber.az saytına müsahibəsində bu sözləri “Sumqayıt”ın yarımmüdafiəçisi Masaki Murata Azərbaycan Premyer Liqasının 24-cü turunda “Şamaxı”ya 0:1 hesabı ilə uduzduqları oyun barədə danışarkən deyib.

O, məğlubiyyətə qaçırılan qol epizodlarının səbəb olduğunu bildirib: “Şanslarımızı dəyərləndirə bilmədik. Ümumi götürdükdə pis oynamadıq. Ancaq bu, heç nəyi dəyişmir. Fakt budur ki, məğlub olmuşuq. Əsas nəticədir”.

Yapon yarımmüdafiəçi komandasının qış fasiləsindən sonra uğursuz çıxış etməsinin səbəbini bilmədiyini deyib: “Heç kim istəməzdi belə nəticə olsun. Komandamız təslim olmaq fikrində deyil. Sonacan mübarizə aparacağıq. İndi avrokuboklar barədə düşünməməliyik. İki ay sonrasını yox, yalnız hər növbəti oyunu fikirləşməliyik. Bu halda bəlkə nəyisə dəyişə bilərik”.

Mutada dəstəyə görə sumqayıtlı azarkeşlərə təşəkkür edib: “Sağ olsunlar ki, uğursuz nəticələrə baxmayaraq, azarkeşlər gəlirlər, dəstək olurlar. Onları məyus etdiyimiz üçün üzülürük. Azarkeşləri, şəhəri sevindirməliyik”.

Fərəc Aslanov