“Araz-Naxçıvan”ın qapıçısı: “Ayağa qalxıb mübarizəmizi davam etdirməliyik”

"Çətin oldu, hesab bizə tərs şillə təsiri bağışladı. Ağır məğlubiyyətdir. Lakin ayağa qalxıb inamla mübarizəmizi davam etdirməliyik”.

Futbolxeber.az saytına müsahibəsində bu sözləri “Araz-Naxçıvan”ın qapıçısı Kristian Avram Azərbaycan Premyer Liqasının 23-cü turunda “Qarabağ”a 0:6 hesabı ilə uduzduqları oyunu şərh edərkən deyib.  

O, "Araz-Naxçıvan"ın qeyri-stabil çıxışın səbəbini belə izah edib: “Bəzən belə şeylər olur. Bu, futboldur. Əsas olan ayağa qalxıb, güc toplamaqdır. Növbəti matçlara hazırlaşmalıyıq”.

Moldovalı qolkiper komandadakı baş məşqçi dəyişlikliyinin mənfi effekt verməsi barədə sualı belə cavablandırıb: “Bu barədə nəsə demək çətindir. Baş məşqçi, məşqçilər heyəti hamısı yenidir. Bunu onlardan soruşmalısınız. Komandada nəyin çatışmadığını onlar daha yaxşı deyə bilər”.

K.Avram sabah 24-cü tur çərçivəsində “Karvan-Yevlax”a qarşı keçirəcəkləri oyundan da söz açıb: “Bizim üçün rəqibimizin neçənci pillədə olmasının fərqi yoxdur. Bütün komandalara qarşı eyni cür hazırlaşırıq. Bütün matçlar çətindir. Yaxşı xarakter ortaya qoyub qələbələr qazanmalıyıq. Hər şeyə hazır olmalıyıq. Gücümüzü 100 faiz nümayiş etdirməliyik”.

Azad Nuriyev