İmad Faraj: “İlk hissədə qol vursaydıq...”

“Birinci hissədə yaxşı oynadıq. Hətta düşünürəm ki, daha üstün tərəf biz idik. 2-3 qol imkanı yaratdıq, amma dəyərləndirə bilmədik”.

Futbolxeber.az saytının məlumatına görə, bu sözləri “Neftçi”nin yarımmüdafiəçisi İmad Faraj Azərbaycan Premyer Liqasının 23-cü turunda “Turan Tovuz”a 0:1 hesabı ilə uduzduqları oyun barədə danışarkən deyib.

Matçdan sonra jurnalistlərin suallarını cavablandıran fransız futbolçu məğlubiyyəti belə şərh edib: “Fasilədən sonra rəqibin cəmi bir epizodu oldu və onu qola çevirdilər. Bundan sonra geridönüş etmək çətin idi, çünki “Turan Tovuz” bütün komanda ilə müdafiəyə çəkildi. Buna görə də oyunu çevirmək alınmadı. Ümid edirəm ki, növbəti oyunda özümüzə gələcəyik və “Qəbələ” ilə matçdan üç xalla ayrılacağıq”.

Oyuna sonadək davam edə bilməyən İ.Faraj zədəsinin ciddi olmadığını söyləyib: “Sadəcə qıcolma idi. Bu gün çox qaçdım, ona görə də oyunun son dəqiqələrində bir az qıcolma hiss etdim. Amma ciddi problem yoxdur”.

“Avrokuboklara vəsiqə qazanmaq istəyən digər rəqibləriniz xal itirəndə qalib gələ bilmirsiniz. Bunun səbəbi nədir?” sualını o, belə cavablandırıb: “Turan Tovuz”la matçın çox vacib olduğunu bilirdik. Ona görə də azarkeşlərdən stadiona çox gəlmələrini xahiş etmişdik. Qalib gəlmək istəyirdik. Dediyim kimi, birinci hissədə çox yaxşı oynadıq. Amma düşünürəm ki, ilk hissədə qol vursaydıq, oyunun gedişi tam fərqli olardı”.

26 yaşlı futbolçu “Neftçi”nin avrokubok şansının getdikcə azalması fikrinə belə münasibət bildirib: “Biz bu barədə düşünmürük. Hər oyuna ayrı-ayrılıqda yanaşmaq istəyirik. Məncə, belə düşünmək daha yaxşıdır: hər matçı qazanmağa fokuslanmaq lazımdır, uzağı düşünməyə yox. Amma dediyim kimi, bu gün xal itirdik. Halbuki rəqiblərimiz – “Sumqayıt”, “Araz” və “Zirə” də qalib gələ bilməyiblər. Buna görə bu oyun bizim üçün çox vacib idi”.