Saşa İliç: “Real yanaşsaq, avrokuboklara yollanmağımız çətindir”

"İlk növbədə "Zirə"ni təbrik edirəm. Kubok oyunları çətin keçir. Birinci hissədə yaxşı oynadıq, fasilədən sonra buraxılan səhvlər qolla nəticələndi. İkinci hissədə oyunu dəyişməyə çalışdıq. Amma Ninkoviçin aldığı qırmızı vərəqəsi planlarımızı pozdu".

Futbolxeber.az saytının məlumatına görə, bu sözləri "Sumqayıt"ın baş məşqçisi Saşa İliç Azərbaycan Kubokunun 1/4 final mərhələsinin cavab görüşündə "Zirə"yə 0:2 hesabı ilə uduzduqları oyundan sonra deyib.

Daha sonra serb mütəxəssis jurnaslitlərin suallarını cavablandırıb:

- Komandada intizam problemi olduğunu qəbul edirsiniz?

- Deməzdim. Oyunçuların bacarığına uyğundur. Verilən tapşırıqları yerinə yetirməyə çalışdılar.

- Nikola Ninkoviç qırmızı vərəqə alana qədər də komandanız rəqib müdafiəsini yara bilmirdi. Bunun səbəbi nə idi?

- Fürsətlərimiz çox olmadı. "Zirə"nin də qol epizodu çox deyildi. İlk fürətdəcə qol vurdular. Bu mövsüm onlarla 4 oyun keçirdik və hamısında bir-birimizə bərabər oyun göstərdik. "Zirə" keyfiyyətli komandadır.

- Mövsümə çox yaxşı başlamışdınız. Sonradan nə baş verdi ki, komanda bu cür enişə keçdi? Bəlkə qış planlarınız özünüzü doğrultmadı?

- Oyunçularla bağlı müzakirə etmək istəməzdim. Bəli, yaxşı başlamışdıq. Müəyyən zamandan sonra eniş oldu. Qarşıda bizi oyunlar gözləyir. Çalışacağıq ki, əlimizdən gələni edək.

- Turnir cədvəlindəki vəziyyəti və kubokla vidalaşdığınızı nəzərə alsaq, avrokuboklara nə dərəcədə ümidiniz qalıb?

- Real yanaşsaq, avrokuboklara yollanmağımız çətindir. Turnir cədvəlində də fərq böyükdür.

- Nikola Ninkoviçi təcrübəsinə əsaslanaraq komandaya dəvət etmisiniz. Amma o, iki oyundur komandanı arxasınca aparmaq əvəzinə sizi pis vəziyyətdə qoyur...

- Nikola Ninkoviçdən gözləntilərimiz böyükdür. Bu gün də qırmızı vərəqə aldı. Ola bilər ki, psixoloji problemləri var, dəqiq deyə bilmərəm. Ona ümidlərimiz var, amma o hələ ki ümidlərimizi doğrultmur.