Rəşad Sadıqov: "Üzərimizdə gərginlik var idi"

"Vacib oyuna çıxmışdıq. Kubok oyunlarının cavab matçları xüsusilə gərgin və stresli olur. Bu tip qarşılaşmalarda sonradan səhvi aradan qaldırmağa vaxt olmur. Üzərimizdə gərginlik var idi. Futbolçularıma təşəkkür edirəm. Yüksək peşəkarlıq göstərdilər. Bundan sonra kubok və Premyer Liqada əsas mərhələyə giririk. Əvvəlkindən daha çox işləməliyik”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Bizon Azərbaycan Kubokunun 1/4 final mərhələsinin cavab oyununda "Sumqayıt"ı 2:0 hesabı ilə məğlub etdikləri oyundan sonra deyib.

Daha sonra o, jurnalistlərin suallarını cavablandırıb:

- "Sumqayıt"la qısa müddətdə 3 oyun keçirdiniz. Əvvəlki iki matçla budəfəki görüş arasında xüsusi nə fərq oldu?

- Xüsusi fərq yox idi. Hamısı eyni məcrada keçdi. Onlar hücum fazasında güclüdür. Rəqibə qol şansı vermədən qalib gəlmək daha önəmli idi. Bu gün də, əvvəlki matçlarda da uduza bilərdik. Onlara uğurlar arzulayıram.

- Sensasiya baş verməsə, yarımfinalda "Turan Tovuz"la qarşılaşacaqsınız. Üçüncü yer uğrunda da məhz Tovuz klubu ilə mübarizə apardığınızı nəzərə alsaq, bu, komandanızın lehinədir, ya əleyhinə?

- Onların gücü hamıya bəllidir. Mən də sizin kimi yarımfinalda "Turan Tovuz"u daha yaxın görürəm. Amma hələ cavab matçı var. Ondan sonra rəqib haqda fikir bildirə bilərik. İndi "Kəpəz"lə çempionat oyununu düşünəcəyik.

- Çətin perioda girdiyinizi dediniz. Bəs rotasiya üçün əlinizdəki heyət kifayətdir?

- Şükür Allaha ilk oyun idi ki, tam heyətlə hazırlaşmışdıq. Ən vacibi bu idi. Yetərincə heyətimiz var ki, rotasiya edək. Düşünürəm ki, ehtiyac olduqca, komanda buna hazırdır. Vacib perioda giririk. Mütləq şəkildə hamının oynamaq şansı olacaq. Futbolçular özləri də oynamaq istəyirlər.