“Komandada çaşqınlıq var idi”

“Oyuna çox pis başladıq və qapımızda iki qol gördük. Həmin dəqiqələrdə komandada çaşqınlıq var idi. Birinci hissəni çox pis keçirdik. İkinci yarıda isə tam əksi oldu. Rəqibin kompakt müdafiəsini yara bilmədik. Fasilədən sonra futbolçular çalışdılar. Amma matçın əvvəlində buraxılan səhvləri sonradan düzəltmək alınmadı”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının 21-ci turunda “Turan Tovuz”a 0:2 hesabı ilə uduzduqları oyun barədə danışarkən deyib.

Daha sonra mütəxəssis jurnalistlərin suallarını cavablandırıb:

- Birinci hissədə dəyişiklik etdiniz. Səbəb nə idi?

- Oyunun əvvəlində İsmayıl İbrahimlidə müəyyən narahatlıq var idi. Onu meydana buraxıb-buraxmamaq barədə fikiləşirdik. Hiss olunurdu ki, oyununa təsir etdi. Hesabda geriyə düşdük və dəyişikliyə getdik.

- "Zirə"nin əvəzedici komandasını izləyirsiniz? Bu mövsüm əsas komandaya əvəzedici heyətdən oyunçu dəvət etmirsiniz deyəsən...

- Mütəmadi olaraq uşaqları dəvət edirik. Əvəzedicilər Liqasını izləyə bilmirəm. Amma oradan komandaya oyunçular dəvət edirik. Kimi hazır görsək, oyuna buraxacağıq.

- Oyunboyu "Turan Tovuz" azarkeşləri sizə qarşı şüarlar səsləndirdi, atmacalar atdılar. Bunu nə ilə əlaqələndirirsiniz?

- Açığı, mən də oyunboyu bilmədim, başa düşmədim onu. "Turan Tovuz" mənə doğma komandadır. Fikir bildirməyəcəm. Çünki səbəbini bilmədim.