Zubir: “10 xal inanılmaz göstəricidir”

“Qarabağ”ın kapitanı Abdullah Zubir UEFA Çempionlar Liqasının Liqa mərhələsinin 7-ci turu çərçivəsində “Ayntraxt”a qarşı keçirilən oyundan (3:2) Futbolxeber.az saytına müsahibəsi verib

- Möhtəşəm, tarixi zəfər barədə fikirləriniz necədir?

- Hazırda çox xoşbəxtik. Bu döyüşü qazandığımız üçün özümüzlə qürur duyuruq. Hesabı erkən açsaq da, üstünlüyü qoruya bilmədik. Oyun birdən-birə əleyhimizə çevrildi. Amma biz gücdən düşmədik, tükənmədik. Təzyiq göstərdik, son dəqiqələrdə isə bunun bəhrəsini gördük. Bəhlul fərqlənərək gözəl, baxımlı qola imza atdı. İnanılmaz hisslərdir. Bunu ifadə etməkdə çətinlik çəkirəm. Hazırda tarixi zəfərimizi qeyd edirik. Bizim üçün böyük oyun idi. 10 xalımız var və 1 matçımız qalıb. Onu da yaxşı nəticə ilə başa vurub pley-off mərhələsinə vəsiqə qazanmaq istəyirik.

- Xüsusilə son dəqiqələrdə oyunu çevirdiniz. Son dəqiqə qolu sizdə hansı təəssüratları oyatdı?

- Bu, olduqca inanılmaz hisslərdir. Heç kim belə bir şey gözləmirdi. Hər bir futbolçu karyerasında bu anları yaşamaq istəyir. Azarkeşlər də bu gün olduqca möhtəşəm idi. Hətta mən belə üçüncü qolu vurduğumuza inanmırdım. Komanda şəklində qürurluyuq.

- Qarşıda sizi “Enfild Roud”a çətin səfər gözləyir. "Liverpul"la matçdan gözləntiləriniz nədir?

- "Liverpul" adının mənasını yəqin ki, başa düşürsünüz. İngiltərə təmsilçisidir, olduqca təcrübəli güclü komandadır. Amma biz orada da çıxıb öz oyunumuzu göstərəcəyik. Nəticəni birlikdə görəcəyik.

- Azarkeşlərə nə demək istərdiniz?

- Hər şey üçün təşəkkürlər! Bu gün onlar möhtəşəm idi. Mən onlar üçün bacardığımın ən yaxşısını etdim.

- “Ayntraxt”la matçda öz çıxışınızdan razı qaldınız?

- Mənim üçün ağır matç oldu. "Ayntraxt" bizə davamlı təzyiq göstərirdi. Son dəqiqəyə qədər maksimumu ortaya qoymağa çalışdım. Nəticədə bunu görə bilərsiniz. Özümlə yanaşı, Bəhlulun adına da çox sevinirəm, bir müdafiəçi olaraq çox çalışır. Müdafiəçi kimi irəli çıxır, son dəqiqələrdə fərqlənir. Bu, həqiqətən də inanılmazdır. O, mənim ən yaxın dostlarımdandır. Onun adına çox sevinirəm. Bəhlul Mustafazadə bu qələbə qolunu vurmağa layiq idi.

-  Son tura qədər bu üstünlüyü qoruya biləcəksiniz?

- 10 xal inanılmaz göstəricidir. 6 ay əvvəl bizə desəydiniz ki, 10 xal toplayacaqsınız... Siz özünüz də bu sözünüzə inanmazdınız. Amma bugünkü xal ehtiyatımız layiq olduğumuzdan irəli gəlir. Son oyunumuz, olduqca çətin bir matçımız qalıb. "Liverpul"un böyük təcrübəsi var. Turnirdə öz sözünü demiş klublardandır. Lakin biz "Qarabağ" olaraq orada da çıxıb bugünkü performansımızı ortaya qoyacağıq. Keyfiyyətli oyun göstərib sonda yaxşı nəticə qazanmaq istəyirik.

- Belə anlaşılır ki, 10 xal qazanmağınız sizin üçün də gözlənilməz oldu. Düzdür?

- Biz rəqabət aparırdıq. İnamlı idik. Oyunlar keçdikcə inanılmaz nəticələr oldu. Özünüz baxın, "Benfika" ilə oyunda son dəqiqə qolu və qələbə, "Ayntraxt"a qarşı matçda eyni ssenari, "Çelsi" ilə heç-heçə. Bütün bu nəticələr inanılmazdır. Bunlardan zövq almalıyıq.

Azad Nuriyev