Yunanıstan çempionu “Qəbələ”də

Heyətini gücləndirmək üçün çalışmalarını davam etdirən “Qəbələ”nin düşərgəsinə yeni futbolçu təşrif buyurub. Futbolxeber.az-ın məlumatına görə, bu, Ukraynanın “Tavriya” klubunda forma geyən Marko Nedir. Fil Dişi Sahilindən olan Ne dayaq yarımmüdafiəçisidir. Onun “Qəbələ”də qalıb-qalmayacağı qarşıdakı günlərdə bəlli olacaq.

Qeyd edək ki, Ne “Tavriya”ya gələnə kimi Avropada “Beveren” (Belçika, 64 oyun; 9 qol), “Olimpiakos” (Yunanıstan, 14 oyun), “Jerminal Beerşot” (Belçika, 10 oyun; 1 qol) və “Kuban” (Rusiya, 45 oyun, 2 qol) klublarında çıxış edib. 2011-ci ildə “Tavriya”ya transfer olunan afrikalı futbolçu 14 oyunda 1 qol vurub. Onun Simferopol təmsilçisi ilə müqaviləsi gələn ilin yayında başa çatacaq.

Ne 2004-cü ildə Fil Dişi Sahili millisinə dəvət alsa da, cəmi 1 oyunda meydana çıxıb.

O, “Olimpiakos”un heyətində 2 dəfə Yunanıstan çempionu olub, 1 dəfə isə ölkə kubokunu qazanıb.