Ceyhun Nuriyev: “Bu məğlubiyyət bizi sarsıtmamalıdır”

“Zirə”nin yarımmüdafiəçisi Ceyhun Nuriyevin Futbolxeber.az saytına müsahibəsi

- Azərbaycan Premyer Liqasının 15-ci turunda səfərdə “Şamaxı”ya uduzdunuz. 1:2 hesablı məğlubiyyəti necə şərh edərdiniz?

- Yaxşı oyunlarımızdan deyildi. İkinci hissənin əvvəlində çox zəif çıxış elədik. Bunun da nəticəsində qapımızda iki qol gördük. Ondan sonra nə qədər çalışsaq da, vəziyyəti dəyişə bilmədik. Çox məyusedici məğlubiyyətdir.

- İkinci hissədə nə dəyişdi ki, rəqib geridönüş edə bildi?

- Biz bir az boşluqlar verdik. “Şamaxı” isə ikinci hissəyə çox yaxşı başladı. Hissənin başlanğını çox pis keçirdik. Halbuki istənilən oyunda birinci hissənin də, ikinci hissənin də əvvəli çox önəmlidir.

- 7 oyun idi uduzmurdunuz. “Qarabağ”a, “Neftçi”yə, “Turan Tovuz”a məğlub olmayan “Zirə” üçün “Şamaxı”nı arzuolunmaz rəqib hesab etmək olar?

- Arzuolunmaz deməzdim, amma ağır rəqibdir. “Şamaxı” harada oynamasından asılı olmayaraq, bu komanda ilə görüş çətin keçir. Yaxın oynayırlar, pressinq tətbiq edirlər. Budəfəki matçın Şamaxıda keçirilməsi işimizi ikiqat çətinləşdirirdi. "Şamaxı” ilə görüşlərimiz həmişə ağır keçir. Udsaydıq da, eyni fikirləri səsləndirəcəkdim.

- Bu məğlubiyyət “Zirə”ni hədəflərindən nə dərəcədə uzaq sala bilər?

- Hələ 15 tur geridə qalıb. Yolumuz uzundur. Bu məğlubiyyət bizi sarsıtmamalıdır. İnanıram ki, sarsıtmayacaq da. Qarşıda bir matçımız var. Daha sonra çempionatda fasilə yaranacaq. Yanvardan sonra daha çox xal yığıb ilk üçlükdə olmaq üçün çalışacağıq.

- İlin son turunda “İmişli” ilə üz-üzə gələcəksiniz. Həmin matçdan gözləntiləriniz nədir?

- Premyer Liqamızda dövrə ərzində 11 rəqiblə üz-üzə gəlirik və bu oyunların hamısı çətin keçir. Son 2-3 mövsümdə asan oyun görməmişəm. “İmişli” də çox qapanan, sıx müdafiə olunan rəqibdir. Ona görə də bizi çətin oyun gözləyir.