Vernidub: “Müddət bitdikdən sonra mütləq qayıtmalıyam”

Tanınmış ukraynalı mütəxəssis, “Neftçi”nin yeni baş məşqçisi Yuri Vernidub ölkəsini hansı qaydada tərk edə etdiyi barədə danışıb.

Futbolxeber.az saytının məlumatına görə, 59 yaşlı məşqçi tribuna.com-a müsahibəsində rəsmi şəkildə ölkədən çıxış icazəsi aldığını deyib.

Onun sözlərinə görə, bu icazə başa çatacaq müqaviləsinin müddətinə qədər qüvvədədir: “Xaricə çıxmaq üçün müqaviləm bitənə qədər icazə aldım. Müddət bitdikdən sonra mütləq qayıtmalıyam və bunu edəcəyəm. Əgər daha tez ehtiyac yaranarsa, o zaman da qayıda bilərəm. İcazə yüksək səviyyədə təsdiqlənib. Başqa kim belə sənəd verə bilər ki? Kim tərəfindən verildiyini isə dəqiq bilmirəm. Yalnız onu bilirəm ki, həmin sənəddə mənim və köməkçilərimin adları var”.

Mütəxəssis əlavə edib ki, onun köməkçiləri də eyni qaydada rəsmi icazə ilə ölkədən çıxıblar: “İcazə olmasaydı, heç kim ölkədən çıxa bilməzdi.”

O, hazırda bütün diqqətini komandanın inkişafına yönəltdiyini deyib: “Hazırda tam şəkildə işə fokuslanmışıq: baxırıq, öyrənirik, analiz edirik. Gələcəyi isə həyat göstərəcək”.

Xatırladaq ki, Ukraynada hərbi vəziyyət olduğuna görə, yaşı 60-dək olan kişilər ölkə ərazisini yalnız xüsusi razılıqla tərk edə bilərlər.

Əlavə edək ki, "Neftçi" Vernidubla 1,5 illik müqavilə bağlayıb.