“Botafoqo” “Qarabağ”ın legionerinə təklif göndərdi - rədd cavabı aldı

“Qarabağ”ın yarımmüdafiəçisi Pedro Bikalyo Braziliyanın "Botafoqo" klubunun maraq dairəsinə düşüb.

Futbolxeber.az saytının məlumatına görə, bu barədə Braziliyanın GE nəşri yazıb.

Bildirilib ki, Rio-de-Janeyro təmsilçisi braziliyalı yarımmüdafiəçinin transferi üçün Ağdam klubuna təklif göndərib. Lakin "Qarabağ" braziliyalıların ilk təklifini rədd edib. "Botafoqo" futbolçunu icarəyə götürmək və müəyyən şərtlər yerinə yetiriləcəyi halda satınalma öhdəliyinin işə düşəcəyi variantı irəli sürüb. Lakin bu, “Qarabağ”ı qane etməyib.

Mənbənin məlumatına əsasən, Azərbaycan çempionu danışıqlarda dərhal ödəniş tələb edir və yalnız bu halda transferə razılıq verməyə hazırdır.

Bildirilir ki, "Botafoqo" 24 yaşlı yarımmüdafiəçini heyətinə qatmaqda israrlıdır və 2026-cı il mövsümü üçün Bikalyo ilə bağlı yeni təklif hazırlayır.