“Qarabağ”ın üzvləri yeni reabilitasiya mərkəzində

“Qarabağ” klubunun nümayəndələri yeni istifadəyə verilən Yeni Robotik Reabilitasiya Mərkəzinə təşkil edilən infoturda iştirak edib.

Futbolxeber.az saytının məlumatına görə, ziyarətdə Ağdam klubunun baş direktoru Əmrah Çəlikəl, İdarə Heyətinin üzvü Asif Əsgərov, baş məşqçi Qurban Qurbanov, köməkçiləri – Elçin Rəhmanov və Çudomir Çakarov, futbolçular – Musa Qurbanlı, Bəhlul Mustafazadə, Toral Bayramov, Nəriman Axundzadə, Kevin Medina, Emmanuel Addai, TƏBİB-in İcraçı direktoru Vüqar Qurbanov, Yeni Klinikanın direktoru Barat Yusubov və Yeni Robotik Reabilitasiya Mərkəzinin rəhbəri Pərvin Əkbərov iştirak ediblər.

Mərkəzlə tanışlıq zamanı P.Əkbərov Mərkəzdə tətbiq olunan müasir reabilitasiya texnologiyaları, xüsusilə idman zədələrinin bərpası və idmançıların performans reabilitasiyası sahəsində istifadə olunan innovativ avadanlıqlar barədə geniş təqdimatla çıxış edib. O, mərkəzdə mövcud olan robotik sistemlərin, yüksək dəqiqlikli analiz cihazlarının və fərdi proqramlaşdırılmış reabilitasiya metodlarının idmançıların daha sürətli və effektiv bərpasına imkan yaratdığını xüsusi vurğulayıb.

"Qarabağ"ın futbolçuları mərkəzin imkanları ilə yaxından tanış olaraq bir sıra avadanlıqları praktiki şəkildə sınaqdan keçiriblər. Onlar avadanlıqların funksionallığı, reabilitasiya prosesinə verdiyi üstünlüklər və idman performansının yaxşılaşdırılmasında rolu ilə bağlı mütəxəssislərdən ətraflı məlumat alıblar.