Maçado: “Araz-Naxçıvan”ın potensialı yenidən avrokuboklara yollanmağa imkan verir”

“Araz-Naxçıvan”ın hücumçusu Ramon Maçadonun Futbolxeber.az saytına müsahibəsi

- Azərbaycan Premyer Liqasının 12-ci turunda “Turan Tovuz”la bərabərə qaldınız. 1:1-lik heç-heçəni necə şərh edərdiniz?

- Bilirdik ki, bizi “Turan Tovuz”la çətin oyun gözləyir. Matça ciddi hazırlaşmışdıq. Hesabda önə keçsək də, yekunda 1 xal qazandıq. Ümumi götürdükdə pis nəticə deyil. İnanıram ki, növbəti matçlarda qələbə qazanacağıq.

- Qələbəni əldən verməyinizə səbəb nə oldu?

- Dəqiq nəsə demək çətindir. 3 xal qazanmaq istəyirdik. Digər tərəfdən “Turan Tovuz” da meydana qələbə üçün çıxmışdı. Ona görə də gərgin oyun alındı.

- “Araz-Naxçıvan” son beş turda yalnız bir qələbə qazanıb. Bunu nə ilə əlaqələndirmək olar?

- Bəzi aparıcı futbolçularımız zədəlidir. Bu da oyunlara tam heyətlə çıxmağımıza imkan vermir. Üstəlik, məşqlərdə daha çox çalışmalıyıq. İnanıram ki, tezliklə vəziyyəti dəyişəcəyik və qələbələri sıralayacağıq.

- Ötən il “Araz-Naxçıvan” demək olar ki, mövsüm boyu ilk üçlükdə idi. Həmin performansı cari çempionatda görə bilmirik. Buna əsasən bəziləri komandada geriləmə olduğunu söyləyir. Razısınız bu fikirlə?

- Xeyr, əksinə, bu il “Araz-Naxçıvan”ın heyəti daha güclüdür. Sadəcə ötən mövsüm startımız çox yaxşı alınmışdı. İlk turda uduzsaq da, sonradan 15 tur məğlubiyyətsiz irəliləmişdik. Bu mövsüm də vəziyyəti daha da yaxşılaşdıracağıq. Tezliklə hər şey qaydasına düşəcək, nəticələrimiz yaxşılaşacaq. İnanıram ki, mövsümün sonunda yuxarı pillələrdə qərarlaşacağıq.

- Yəni “Araz-Naxçıvan”ın potensialı yenidən avrokuboklara yollanmağa imkan verir?

- Əlbəttə, komandamızda bu potensial var. Məqsədimizə çatacağımıza inanıram.  

- Növbəti turda Qəbələyə səfər edəcəksiniz...

- Səfərə 3 xal üçün gedəcəyik. Həmin matçda qalib gəlməliyik. Əlimizdən gələni də edəcəyik ki, istəyimizə çataq.

Fərəc Aslanov